GUWAHATI: Re·anggipa jao Assam aro Meghalaya a·dokni simao ong·gipa a·selni bidingo ma·sie ra·na gita Assam sorkarini songe on·gipa inquiry commission, Budbar salo Mukroh songona re·ange nieaha. Ia a·selni bidingo sandirokna gita Assam sorkari, Gauhati High Court-ni gitcham Judge, Justice Rumi Kumari Phukan-chi dilgipa mande saksani inquiry commission-ko songahachim.
Mukroh songona re·angani somoio Justice Phukan, kobor ra·timgipa manderang baksa agangrikengon, ia songona re·ange am·sandianichi aro ia a·selni bidingo segipa report-rangko nie ra·anichi ia a·selni bidingo name ma·sina dakchakgen ine parakataha.
Koborko on·ani gitade, ia songona re·angani somoio inquiry commission, ia songo Assam police-rangni gogipa biaprangko aro ma·sina man·gijagipa manderangni so·chipgipa forest beat office-koba niangaha.
“Ia salo chinga a·sel ong·gipa biaprangko aro sigipa manderangko man·gipa biaprangkoba niangaha. Ua salo mikrontangchi nikgipa manderangni sakkirango pangchake aro map-rangko nie ia a·selni gimin talbate ma·sina man·gen. Ia biapona re·ange nigijade ua salo maimancha ong·a, uko ma·sina man·jawachim,” ine Justice Phukan parakataha.
Assam inquiry commission-ni Mukroh songona re·angani somoio Police aro Forest-ni official-rang baksana Karbi Students Association-ko man·chape mitam dolni dilgiparangba dongpaahachim.
Re·anggipa November-ni 22 tariko, Mukroh songo Assam police-rangni goanichi songni sakbonga manderangko man·chape Assam Forest guard saksani sianggipani bidingo sandirokna gita re·anggipa jaon Assam sorkari, inquiry commission-ko songe on·ahachim ine nikna man·a.
Ia commission-ni inquiry report-ko jagnini gisepon on·china gitaba Assam sorkari ge·etangahachim.