TURA: Re·baenggipa jani gisepon General Assembly Election 2023-ko ong·atna siengani gimin Persons with Disabilities (PwD) ba be·enni gita cholgri ong·gipa manderangna SVEEP-ni program-rangko aro awareness program-rangko ong·atna gita Bristibar salo, SVEEP Core Committee-ni membor-rang, Tura-ni DRDA Conference Hall-o tom·e chanchirimangaha.
Ia tom·anio Tura DRDA-ni Project Director Dolrich Berin G Momin, tom·anio bak ra·giparangna aganprakengon, Meghalaya Legislative Assembly election-o manderangni pu·onaniko nambatatna gita Meghalaya a·dokni Chief Electoral Officer (CEO) ge·etaniko on·manahani gimin Election Commission-ni a·bachengatgipa ‘Mission 300’-chi dingtang dingtang program-rangko ong·atna sienga ine parakataha.
Ia tom·anio, be·enni gita cholgri ong·gipa manderangna awareness campaign-rangko ong·atani bidingo Tura-ni ADC (Election) Rojalinda D Shira agan-talataniko on·angskaengon, West Garo Hills a·jani be·enni gita cholgri ong·gipa manderangko sandianio uamang, Social Welfare department-ni dakchakaniko nanggen ine parakataha. SVEEP strategy action plan-ko tarichina aro a·jao pu·ongiparangna mikrakatanirangko on·anio kamrangko nirokchina gita ua Core Committee-ni membor-rangkoba ge·etangaha.
2018 bilsini Assembly election-o pu·onanirang komibatgipa Assembly constituency damprakni dambonga polling station-rango ra·gatna sienggipa Mission 300-ni bidingo talataniko on·angengon, ia Mission 300-ni mongsonggipa miksonganiara, 2023 bilsini Assembly election-o manderangko re·bae pu·onchina didianian ong·enga ine Shira parakataha.
2018 bilsini Assembly election-o 34.37 voting percentage ong·gipa Hawakhana polling station, 56.63 percent ong·gipa Lower Babupara aro 59.36 percentage ong·gipa Chandmary polling station-rango pu·onanirang komibataha ine janapatengon, ia polling station-rango pu·onanirang komiahani a·selara mitam manderang pu·onna gita sokbajaha aro mitam chatro chatrirangde gipin biaprangosa poraigiparang ong·e election-ni somoio pu·onna gita sokbana man·jahakon ine Shira parakataha.