SHILLONG: NPP-ni national president aro a·dokni chief minister Conrad Sangma, Budbar salo Trinamool Congress (TMC)-ni uni re·baenggipa election-o susaani bidingo agananina aro TMC-ni election-o chee sasonona re·bagenchimode lak 3 kamrangko on·gen ine ku·chakanina aganchakaniko on·ataha.
Opposition dolni dilgiparang ‘TMC jersey’-ko ganne manderangni nangnikenggipa dingtanganiko ra·baenggipa ine dakmikenga, maina uamang Congress-o ong·e bilo ong·mitingon ia cholko galataha ine ua aganaha.
“Lak 3 kamrangko uamangni ku·chakaniko uamang dakbebegenchimode, uamangni sasono ong·mitingon dakgenchim. Indiba uamang unomiting mamungkon dakna ja·ku de·jaha, uni gimin uamang mai gital ja·ku de·anirangko dakgen angade u·ija,” ine uamangni sasono re·baode lak 3 kamrangko chadamberangna on·gen ine ku·chakgipani gimin chief minister aganaha.
“Congress-ni bilsichetna sasono ong·mtitingo manderang uamangni kamrangko nikaha aro uamangni janggi tanganio neng·nikanirangko on·anirangko nikaha ine anga bebera·a, je project-rangnan uamang pangchakani ro·ongrangko songahachim aro kamrangko a·bachengahachim, uarangko matchotatnaba uamang tangkarangkoba man·jaha,” ine ua agandapaha.
MDA sorkari ia matchotgijagipa project-rangko matchotataha, jekai Ampati water supply scheme, ineba NPP nationa president aganaha. “Rai-ko on·ani ja·mano, bang·gija tangkarangsan, kror 5 ba 10-ni gitasan re·anggipa sorkarini sasono ong·mitingo man·aha,” ine ua aganengon, Ampatini project-na kror 100 ong·nasiple tangkarangko on·ahachim ine agandapaha.
Manderang dingtanganiko ra·bana 2018 bilsio pu·onaha ineba CM aganaha.
“Da·o an·ching dingtang dingtang re·mikkanganirangko aro dingtang dingtang program-rangko a·bachengataniko nikna man·engaha. Game cha·giparangna dakchakaniko on·aha, dol 45,000 self-help group-rangko bikotaha aro bang·a dingtang dingtang kamrangko gital man·ani cholrangko bikotaha aro una agreba sakgipinrangna kam on·na man·gipa cholrangkoba bikotna man·aha,” ine ua aganaha.