Ri-Bhoio sakbri Cong candidate-rang nomination file ka·a

NONGPOH: Umsning constituency constituency-oni susaenggipa Dr Celestine Lyngdoh-ko man·chape Ri-Bhoi district-ni sakbri Congress candidate-rang- Nongpoh constituency-oni Rona Khymdeit, Umroi constituency-oni Stanlywiss Rymbai aro Mawhati constituency-oni Charles Marngar mang, re·baenggipa Assembly election-o susana gita mijalo, Deputy Commissioner-ni office Nongpoh-o paltangtang gita Returning Officer-rangni mikkango nomination file ka·angtokaha.
Nomination file ka·ani ja·mano koborni manderangna aganengon, A·doko ong·nasienggipa election-o susana gita dakgni kamrangko chu·sokatna man·anina kusi ong·bejok ine Ri Bhoi District Congress Committee (RBDCC) President, Charles Marngar aro Meghalaya Pradesh Congress Committee (MPCC)-ni gitcham President, Dr. Celestine Lyngdoh mang aganaha.
Sak 12 Congress MLA-rangni gipin political party-rangona katgrimangani ja·mano batanggimin adita jarangna Congress party-ni gisepo manderangni gisikrango adita dongsiksakanirang ong·ahachim, indiba da·o gitalgipa mikkangrangko niksotaina man·enba party bilakbapiltaiaha, a·dokni gimik ge 60 assembly seat-rangon candidate-rangko sussaatna gita party-o bil donga ineba uamang aganaha.
Congress dilgiparang indakeba aganaha je re·baenggipa election-o maming kenchakani grian Congress, bilakbatgipa dol ong·gen aroo sorkariko rikenba a·dokko silroroao rikgen.