TURA: West aro North Garo Hills a·jani ning·o donggipa B Mahal-ni a·arangko NPP-ni dilanichi MDA sorkari, MIDC aro MTDC-na pale cha·aha ine matnanganiko Sukrobar salo NPP-ni national president aro a·dokni Chief Minister Conrad K Sangma jegalatenba, ian GHADC-ni gitcham chief executive membor aro Raksamgre-ni gitcham MLA Benedic Marak-ni skatang bil jakkalna jotton ka·ani a·selsa ong·aha ine matnangataha.
Sukrobar salo, NPP-ni national president, Raksamgre constituency-o NPP-ni candidate Limison D Sangma-na campaign ka·engmiting somoio ia kattarangko aganaha.
“GHADC-ni CEM ong·engmiting somoio Raksamgre constituency-ni gitcham MLA Benedic Marak, MDC-skarangni agananiko knachakgija aro NPP sorkarini agananiko knachakgija, an·tangni bilko jakkale, B Mahal-o niamrangko tarienba, manderangni a·arangko ra·sekna jotton ka·aha,” ine Sangma parakataha.
Benedic Marak-ko NPP-oniko ra·galani gimin janapatengon, uni iandake party-ni kosako aro party-ko dilenggiparangni kosako bil jakkalna jotton ka·ani bidingo NPP-ni dilgiparang, MDC-rang aro MLA-rangni badi ka·aniko man·ahani giminsa NPP-oniko ra·galaha aro uni biapo Limison D Sangma-na tikitko on·skaaha ine NPP-ni national president parakataha.
B Mahal-ni a·arangko MIDC aro MTDC-na pale cha·aha ine dingtang dingtang dolrang, NPP-chi dilgipa sorkari aro GHADC-ni kosako matnanganirangko daktokengachim ine nikna man·a.
