SHILLONG: Re·baenggipa March 20 tarikoni a·bachengatna sienggipa Meghalaya Assembly-ni Budget Session-o Vote on Account-kosan ong·aigija chu·gimik budget-kon pass ka·gen ine Bristibar salo, a·dokni Chief Minister Conrad K Sangma parakataha.
Iani bidingo kobor ra·timgipa manderang baksa agangrikengon, Budget session-ko ong·atani bidingo chanchirimna gita Sombar salo, Assembly-ni Business Advisory Committee (BAC) tom·e chanchirimna sienga ine Chief Minister parakataha.
Budget session-ko March 31 tarikon matchotatna nangtelama ine sing·on, Budget-ni kamrangko name ka·na man·na gita session-ko ia jani gisepo matchotatna man·ode uan nambata ine Sangma parakataha.
“Vote on account-kosan chinga pass ka·a ong·ode, uan April jaoni June jaonasan ong·engani gimin chu·gimik budget-ko pass ka·na gita chinga Assembly session-ko ong·atpiltaina nangao ga·akgen aro vote on account-kosan pass ka·aia ong·ode chu·gimik budget-de ong·jawa,” ine Chief Minister aganaha.
Budget-ni kamrangko matchotatna gita uamang batanggimin jarangonin kamko ka·soengahachim ineba Chief Minister parakataha.