Wednesday, May 14, 2025
spot_img

Ballonggre jolo JJM-ko ra·gatani a·sel chirangko man·jaenga ine matnanga

Date:

Share post:

spot_imgspot_img

TURA: Tura jillani rikamo donggipa Ballonggre jolrango Jal Jeevan Mission (JJM)-ni kamrangko ka·angani ja·man, ia biaprango jokenggipa chirangba da·o joksrangjaengaha ine jolo songdongenggipa manderang parakataha.

Jolo songdongenggipa manderangni u·iatani gitade, ia jolrango JJM-ni kamrangko a·bachengna skangde chirang namen jokkuengachim indiba ia jolrango JJM-ni kamrangko a·bachengataonin da·o jolni manderang baditaba jarangna chirangko man·srangjaengaha aro chirangko breesa jakkalna nangtokengaha.

Indake ong·genchimoba, PHE department-oni u·iatskaani gitade, Ballonggre jolrangna tarigipa tengkio chi gapatna gita chirangko watatengachim indiba ia jolrango chi wataniko nirokenggipa manderang simsakjani a·selsa chirang, nokantiona sokangskajaengachim.

Koborko on·ani gitade, Ballonggre jolni JJM project-ko BSC Infratech minggipa company, gong kror 1.3 koros ong·e kamko 2022 bilsini a·bachengachipakan matchotahachim.

Ia jolrango JJM-ni kamko ka·gipa company, jolo donggipa nokdangrangna pipe-rangko soke sale on·skajaha aro ramasamrangosa dambonga damdok biaprango chidikrangko donskaaha ine jolo songdongenggipa manderang parakataha.

“Chingna uamang chi pipe-rangko soke sale on·jaha aro ramarangosa chidikrangko done chinga an·tangtangko pipe-rangko breenba an·tangtang sale ra·china aganaha. Chingoni mitam nokdangrangde ramarango dongipa chidikrangoni metre 100-na baten chel·a aro chingoni bang·batan hajira ka·e cha·paenggiparangsa ong·ani gimin indita chi pipe-rangkode bree jakkalpana man·jawa,” ine Ballonggre songni Nokma Nonsing Ch Marak parakataha.

Mitam nokdangrangde chi pipe-rangko bree chidiko teknade man·ahachim indiba darangan da·ona kingking chirangko man·kujaenga ineba Nokma parakataha.

Songni manderangko chi salna gita nokdangprako gong 1200/- gamchina aganahani gimin tangka paisarangko gamtokahachim ineba songni manderang matnangataha.

Iani bidingo sing·sandianirangko dakatskaon, ia chidikko chalaienggipa, jean a·ani nokgipaba ong·achim, uasa songni manderangna chiko watjaenga ine PHE official-rang parakatskaaha.

“Chirangko chinga mongsonggipa tengkiona watatengachim indiba ia tengkiko chalaienggipa mandesa chiko watjaenga,” ine PHE official parakataha.

Indake ong·engon, iani bidingo PHE-ni official-rang ta·raken ia biapona re·ange sandirokanirangko dakgen aro nanga gita ja·kurangko de·gen ine PHE official parakataha.

spot_imgspot_img

Related articles

HC orders govt to put up fresh tender for supply of CGI sheets

SHILLONG, May 13: The Meghalaya High Court has directed the state government to float a fresh tender for...

Alleged scam in GHADC: MDC files FIR with DGP

SHILLONG, May 13: Alleging large-scale corruption, fraud, and financial mismanagement in the Garo Hills Autonomous District Council (GHADC),...

Railways: NPP renews appeal to VPP, Cong to join all-party panel

SHILLONG, May 13: The National People’s Party (NPP) on Tuesday made a fresh appeal to the VPP and...

Trump hyphenates India, Pakistan; Congress questions PMO’s silence

New Delhi, May 13: With US President Donald Trump reiterating his claims about having “successfully brokered” a “ceasefire”...