WILLIAMNAGAR: Khasi Hills aro Jaintia Hills-ni MLA-rangde sikap tangkap dakpile reservation policy aro roster system-ni bidingo ku·rangko on·engoba Garo Hills-ni MLA-rangde saksaba ku·rang on·gipa dongjaenga ine East Garo Hills a·jani A·chik Organisation for Social Welfare (AOSW) suk ong·gijaniko parakatenba, Garo Hills-ni MLA-rangkoba Garo Hills-ni namgnina reservation policy aro roster system-ni bidingo ku·rang on·china didiataha.
AOSW-ni general secretary Premiar N Sangma-ni parakatani gitade, reservation policy aro roster system-ni bidingo Garo Hills gimikoni a·dokni Chief Minister Conrad K Sangma saksansa ku·rangko on·engpiti aro ua pilakni namgninan ia kamrangko ka·dilenga.
“Iandake joltangni aro jattangni namgnina ku·rangko on·na nangani somoio Garo Hills-ni gipin MLA-rangara bachi gimachiptokenga? A·chik chadamberangna a·dokni reservation policy-ko skango gitan apsan ong·e dongako nangnikengon, MLA-rangni ku·rang on·anikoba nangchongmotenga,” ine AOSW-ni dilgipa parakataha.
State reservation policy-ko gital dake nipiltaichina mitam Khasi aro Jaintia dolrangni dabienganikoba AOSW raken jegalataha.
“1972 bilsio tarigipa job reservation policy-ko taripiltaina nangani katta dongja maina iako a·dokni pagitchamrangsa, a·doko songdongenggipa jatgittamni namgnina niroke aro Indian Constitution-ni niamrango pangchake tariaha,” ine Sangma parakataha.
1972 bilsioni A·chikrangni gimaatna nanggipa kamrangko on·pilgija Voice of the People’s Party (VPP)-ni dilgiparang kate jokna jotton ka·engaha ine janapatengon, ia kamrangko A·chik jatna on·pilna gita reservation policy-ko a·bachengataonin da·o roster system-ko ra·gatna nangenga ine AOSW parakataha.
“VPP-ni dilgipa Ardent Miller Basaiawmoit-ko ramarango manderangko dilsretjachina chinga mol·molenga. Kakketko sandichenggija ramarango jingjengate roaniara an·tangni gamchatgipa somoirangko indin bon·atani gitasan ong·aigen. Na·simang chadamberangni namgnina chanchibebeenga ong·ode ramarango jingjengate roaigija, High Court-o ba chubata gadangni kacharirangona re·ange kacharini raini kosako ra·biesrangbo,” ine AOSW-ni general secretary parakataha.