SHILLONG: Meghalaya a·doko poraia dontonggipa chadamberang batrorobaengani gimin Education department-ni advisor aro Bharatiya Janata Party (BJP)-ni dilgipa HM Shangpliang, an·tangni suk ong·gijaniko parakatenba, iani bidingo ja·pangko ma·sie ra·na gita am·sandianirangko dakgen ine parakataha.
“A·doko poraia dontonggiparang salantian batrorobaenganiara an·ching gimiknan namen jajrengna nangani ong·enga. Uni gimin chinga a·selko ma·sina gita am·sandianirangko dakenba ia neng·nikaniko namatna jotton ka·gen,” ine Shangpliang aganaha.
Dingtang dingtang a·selrangchi poraidapangkuna chol ong·gijagipa chatro chatrirangna gital Education Policy-o dingtang dingtang cholrangko on·enga ine janapatengon, ia chatro chatrirangna mikkangchi janggi tangani cholrangko on·na gita jakni kamrangkoba skie on·na nangenga ine Education department-ni advisor parakataha.
Class 8-oni class 12-ona vocational skill development-koba sorkari on·na miksongenga ine janapatengon, chatro chatrirang poraidapangkuna chol ong·jagenchimoba mikkangchi dingtang dingtang kamrangkoba ka·e cha·na man·na gita dingtang dingtang jakni kamrangko bilsi bongana skie on·gen ine Shangpliang parakataha.
Shangpliang-ni parakatani gitade, a·ja ge·antion review aro monitoring committee-ko dongen ine sorkari, batanggimin chang Assembly session-o aganmanaha aro ia dam 12 a·jarango committee-rangni tom·aniona ua, education minister baksa re·ange bak ra·anggen.