SHILLONG: Gipin a·dokrangoniko Meghalaya a·dokona na·tok ra·bae palaniko sal 15-na a·dok sorkari champengatahani gimin Sukrobar salo, Shillong songjinmani Iewduh ba Bara Bazar-o na·tok pale cha·enggipa manderang, Khasi-Jaintia Fish Wholesalers & Retailers Association-ni bimingo jinma jegalgrimaniko dakangskaaha.
Gipin a·dokrangoniko Meghalaya a·dokona na·tok ra·napbaaniko champengatengani gimin sorkariko jegalatengon, na·tokrangko a·dokona ra·bana skangan porikka ra·chengna nanga aro porikka ra·ani ja·mansa ra·bana man·engachim ine association-ni membor T Wankhar parakataha.
A·dokona na·tok ra·napbae palaniko champengatengani gimin uamang sorkarini on·gipa order-ni bidingo sing·sandianirangko dakangkugen ineba Wankhar parakataha.
Sukrobar salo na·tok badinggiparangni iandake jegalanirangko dakahani gimin Iewduh-o na·tok palgipa biapko chipe donataha.
Meghalaya a·dokona gipin a·dokrangoniko ra·baenggipa na·tokrangko porikka ra·anio cancer aro dingtang dingtang sabisirangko ong·atna man·gipa formalin samrangko man·ani ja·man gipin biaprangoniko a·dokona na·tok ra·baaniko sal 15-na champengataha ine Food Safety-ni Commissioner Rosetta Mary Kurbah parakatahachim.
Food Safety Commissioner-ni parakatani gitade, mang 40 na·tokrangko porikka ra·e iani report-ko man·soanio mang 30-ode formalin samko man·aha ine sorkarini Food Analyst-ni report-o parakahachim.
Ia formalin samrangara, na·tokrangkosan ong·aigija manggisirangkoba soatgija rakkina jakkalgipa sam ong·e mandena cancer aro uandakgipa ma·manti sabisirangko ong·atna man·achim.
