SHILLONG: Manipur a·doko so·sojengjeng ong·enganichi Meghalaya a·doko katnape dongenggipa manderangko name see rakkichina aro tom·tomaniko sokbapilahaon Manipur a·dokona watatpilchina gita Bristibar salo, Voice of the People’s Party (VPP), a·dok sorkariko didiataha.
Manipur a·doko Meitei manderangnaba Scheduled Tribe (ST) gadangko on·china dabianiko dingtang dingtang Tribal jatrangni jegalani ja·man dingtang dingtang jatrangni gisepo so·sojengjeng ong·anirang ong·katahachim ine nikna man·a. So·sojengjeng ong·anio bang·a manderangan janggirangko gimaatna nangaha aro bang·a manderangan nokgri jamgri ong·atako man·na nangahachim ineba nikna man·a.
Manipur a·doko iandake so·sojengjeng ong·engani gimin mitam nokdangrangde Meghalaya a·dokona katnape dongtokskaengachim ineba nikna man·a.
Indake ong·engon, Manipur a·dokoni katnapbagipa manderangko name see rakkichina aro so·sojengjeng ong·anirang nampile tom·tomaniko man·piltaiahaon, ia manderangko Manipur a·dokona watatpilchina gita VPP, a·dok sorkariko didiataha.
Iani bidingo a·dokni Home Minister-na sedoatengon, “Manipur a·doko dingtang dingtang jatrangni dinggrikanichi so·sojengjeng ong·anina Manipur a·dokoni katnapbagipa manderangko ka·sae nokchakahani gimin anga VPP-ni pal sorkariko mittelpilna ska. Indake ong·genchimoba, Manipur a·dokoni katnapbagipa manderangko name see rakkiskachina aro uamang a·doko songdongkamna man·jana gita tom·tomani sokbapilahaon uamangko Manipur a·dokona watatpilskachina chinga sorkariko mol·molenga,” ine VPP-ni general secretary Ricky AJ Syngkon parakataha.
