AMPATI: India a·songni G-20 Presidency-ni bak gita Education Ministry baksana Meghalaya State Education Mission, South West Garo Hills SSA-ni District Mission Coordinator-ni dilanichi Janbhagidari program-rangko Bristibar salo, South West Garo Hills a·jani Ampati Multi Facility Centre-o ong·atangaha.
Ia program-ko ong·atanio dingtang dingtang susaanirang, jekai wall painting, storytelling, Maths Mela, TLM Exhibition aro jatni program-rangkoba ong·atangaha aro ia program-rango South West Garo Hills a·jao donggipa dingtang dingtang skulni chatro chatrirang bakko ra·angtokaha.
Ia susaanirango chegipa chatro chatrirangna certificate aro boksisrangko on·angaha.
Ia program-ko ong·atanio South West Garo Hills a·jani Additional Deputy Commissioner YW Momin, mongsonggipa sokgipa ong·e bakko ra·angaha aro unbaksana SWGH a·jani District School Education Officer T Ch Marak, Sub-Divisional School Education Officer E Marak, dingtang dingtang skulni chatro chatrirang, skigiparang aro ma·a paarangba bakko ra·angtokaha.
