TURA: India a·songni G-20 Presidency-ni bak gita re·anggipa Sombar saloni a·bachengatgipa Janbhagidari program-ko Bristibar salo, Tura-ni Dakopgre-o donggipa SMELC Building-o matchotataha aro ia program-ko matchotatani somoio, dingtang dingtang susaanirango chegipa chatro chatrirangna boksisrangko sualataha.
Ia program-ko West Garo Hills SSA-ni District Mission Coordinator-ni gita ong·atangahachim.
Ia Janbhagidari program-ko matchotatanio Tura ICFAI University-ni Advisor Viola Sonatchi B Sangma, mongsonggipa sokgipa ong·e jinmana aganprakangengon, Education department-o kamko ka·enggipa official-rangni rakbee kamrangko ka·engani a·sel ua dingtanganirangko nikna man·engaha ine parakataha.
Bi·sarangko namao dal·droatna gita Child Centric Education System-ko nangengani gimin janapatengon, da·ororo bi·sarang gisiko nangbate skie ra·na aro altubate skie ra·na man·na gita sorkari, dingtang dingtang cholrangko a·bachengate on·aha ine Sangma parakataha.
Chatro chatrirangna English ku·sikko skie ra·na nangchongmotani gimin aganangengon, porikkarangko seanio aro kamna interview-rangko mikkangpaanio English ku·sikko nangchongmotani gimin chatro chatrirang pilakan English ku·sikko nambate skie ra·na nanga ine ICFAI University-ni Adviser parakataha.
Ia Janbhagidari program-ko ong·atani bak gita dingtang dingtang susaanirang, jekai TLM Exhibition, Story Telling, Quiz, Poem Recitation aro uandakgipa susaanirangkoba ong·atangaha aro ia susaanirango chegiparangna boksisrangko suale on·angaha.
