TURA: Meghalaya a·dokara me·chikrangchikosa chatchi de·gipa aro gam-jinrangko on·rikgipa a·dok ong·genchimoba, me·chikrangni kosako ong·gija dakanirang batroroengani gimin Trinamool Congress (TMC) suk ong·gijaniko parakatenba, me·chikrangna naljokanirangko on·na man·na gita ta·raken ja·kurangko de·china a·dok sorkariko didiataha.
“Meghalaya a·doko me·chikrangni kosako ong·gija dakani case-rang batroroengani gimin chinga namen jajrengchakenga aro me·chikrangna naljokanirangko on·na gita ta·raken ja·kurangko de·china sorkariko didienga. Me·chikrangni kosako ong·gija dakgipa manderangna rakbatgipa sastirangko on·na gita niamrangko bilakbatatchina aro kal·aka man·gipa me·chikrangna nanga gita dakchakanirangko on·chinaba sorkariko didienga,” ine TMC-ni chadambe dolko dilgipa Richard M Marak parakataha.
Iandakgipa neng·nikanirangko namatna ja·ku de·anio dingtang dingtang dolrang baksa bakrime kamko ka·china gitaba TMC didiataha.
Me·chikrangna nanga gita naljokanirangko on·china sorkariko didiatengon, iandakgipa case-rangko ta·rake jako ra·na man·na gita police-rangko bariatchina aro iandakgipa case-rangko jako ra·enggipa police-rangna nambate training-rangko on·china Marak didiataha.
Dos dakgipa manderangna ta·raken sastirangko on·na man·na gita fast-track court-rangko kulichina, kal·aka man·gipa me·chikrangna sanna banani, ainni gita dakchake on·ani aro ku·pattianirangko on·na man·na gita chu·gimik cholrangko on·china gitaba TMC-ni youth leader, sorkariko didiataha.
Me·chikrangni kosako ong·gija dakanirangko bon·atna ba komiatna man·na gita manderangna mikrakatanirangko on·china aro dingtang dingtang dolrang baksa bakrime kamko ka·china gitaba Marak didiataha.
2022 bilsina Meghalaya Police-ni see rakkianiko parakatani gitade, ia bilsimangmangon me·chikrangni kosako ong·gija dakani gimik ming 603 case-rangko segatahachim aro ia ming 603 case-rangoni ming 345-de Protection of Children from Sexual Offences Act 2012 (POCSO), ming 78-de drae til·ekani aro ming 63 case-rangde me·chikrangko kragija dake jak sokani case-rang ong·achim.