SHILLONG: Meghalaya a·doko Labour aro Infiltration gita dakgipa department-rang kakket aro bebeo kam ka·jagenchimode a·doko Inner Line Permit (ILP)-ko ra·gatgenchimoba, niam gri napsrukanirangko champengna man·jawa ine Budbar salo, Opposition dolni Chief Whip aro Gambegre constituency-ni Congress MLA Saleng A Sangma, jajrengchakaniko parakataha.
Meghalaya a·doko niam gri napsrukbae songdong a·chaanirangko nangchakegipa department-rang, nirok sandina gisiko nangjaengani gimin Saleng, ia kattarangko aganaha.
Byrnihat-o donggipa infiltration gate-o walni somoirangoba manderangni re·napbaenganiko name nirokjaenga ine suk ong·gijaniko parakatengon, iandakgipa department-rang kamtangtangko kakket aro bebeo ka·ja ong·ode ILP gita dakgipa niamrangba indin ong·gramaigen ine Opposition dolni Chief Whip parakataha.
“Meghalaya a·doko niam gri napsrukanirangko nirokna gita infiltration branch, district council, labour department aro Meghalaya Residents Safety & Security Act (MRSSA) gita dakgipa niamrangba dongachim indiba uamang kamtangtangko name ka·jaengani a·selan gipin biaprangoni manderang niam gri napsrukbana man·enga,” ine Sangma janapatenba, songtangtangko nirokenggipa manderangba songtangtang aro gittimtangtangona gipin biaprangoni re·baenggipa manderangkode nirokna nanga ine parakataha.
Salantian Shillong-o ma·manti bosturangko palenggipa gital manderangko nikna man·enga ine janapatengon, a·doko niam gri napsrukanirangko champengna dongimin niamrangko name ja·rikchina aro rakkichina gita ua infiltration branch, district council, labour department aro uandakgipa department-rangko didiataha.
ILP-ko ma·mong sorkario dabina gita Assembly-o resolution-ko pass ka·manahachim ine janapatskaengon, MRSSA gita dakgipa niamrangba niam gri napsrukanirangko champengna namgipa niamrangan ong·achim indiba department-rang, an·tangtangni kamrangko kakket aro bebeo ka·na nangenga ine Sangma parakataha.
Labour aro Infiltration dept-rang name kam ka·jaode ILP-ko ra·gateba namgni dongjawa: Saleng
Date:
Share post:
