SHILLONG: Meghalaya aro Assam a·dokni simarango ong·enggipa golmalrangko namatna kam ka·anio da·o a·dokni regional committee-rang, sima jolrango donggipa biaprangona re·ange songni manderang baksa agangrikna siengani gimin je biaprango songdongenggipa manderangan Meghalaya a·dok ning·o ong·na sikengachim, uandakgipa songrango songdongenggipa manderang pilakkon regional committee-rangna apsan ong·e ku·rang on·china Khasi Hills Autonomous District Council (KHADC)-ni dilgiparang didiangaha.
A·dok damgnini simarango meligrikna man·jaenggipa biaprango namgrikaniko ra·bana gita skanggipa kam ka·anio, iandake sima jolrango songdongenggipa manderang apsan ong·e ku·rang on·jani a·sel mitam songrang Assam-o napangna nangahani gimin da·o ia gnigipa changode manderangni gisepo dingtanggrikani dongjachina aro apsan ku·rang on·china gita adita salrangna skang, KHADC-ni dilgiparang, ia jolrango songdongenggipa manderang aro dilgiparang baksa tom·e agangrikangaha.
Ia tom·anio bakko ra·anggipa manderangara, Desh Doomreah, Nongwah Mawtamur, Borduar, Langpih aro Block-II jolni dilgiparang ong·achim.
Ia tom·aniko ong·atani bidingo talataniko on·angengon, ia dambonga biaprango songdongenggipa manderang, Meghalaya a·dok ning·o ong·na nangniktokengani gimin regional committee-rangni mikkangoba apsan daken jinma ku·rang on·china KHADC nangnikenga ine KHADC-ni Deputy CEM PN Syiem parakataha.
Syiem-ni parakatani gitade, ia tom·anio bak ra·gipa pilak dilgiparangan Meghalaya a·dok ning·o ong·na skaniko paraktokaha.
Ia dilgiparangan da·o songtangtangni manderangna iani bidingo talate on·angskagen ine janapatengon, iandake songni manderang ku·cholsan ong·e ku·rang on·genchimosa regional committee-rangba uamangni nangnikanirangko ma·sie sorkarina report-ko on·skana man·gen ine KHADC-ni Deputy CEM parakataha.
Assam aro Meghalaya a·dokni regional committee-rang, ia jani gisepon Desh Doomreah, Nongwah Mawtamur aro Borduar jolrangko re·ange niena miksongengachim.
Iani ja·man a·dok damgnini regional committee-rang, Ri Bhoi aro Block-II jolrangko nieskana siengachim.