U·IATTIMGIPAONI
SHILLONG: New Shillong Township (NST)-ni Water Supply Scheme-na a·dokni PHE department, gong kror 2000-na baten tangka paisana proposal-ko tarienga.
“New Shillong Township-na chinga dingtang water supply scheme donggen aro iana tangka paisarangko bi·atna gita chinga proposal-ko da·o tarikuenga. Da·o dipet chinga badita tangkarangko man·sogen name ma·sikujaengoba gong kror 2000-na baten chinga proposal-ko tarienga,” ine Mongolbar salo, a·dokni PHE Minister Marcuise N Marak parakataha.
Greater Shillong Water Supply Scheme (GSWSS) Phase III-ni kamrang namen matchotangengaha ineba PHE Minister parakataha.
Ia scheme-ni kamrango adita neng·nikanirang dongahani a·sel kamrang ja·manchakaha ine janapatengon, ia a·selrangoni mingsade main feeder-ko donna aro pipe-rangko sualna permission-ko man·anian ong·aha ine Marak parakataha.
“Main feeder pipe-rangko salna gita Defence-ni official-rang permission-ko on·ahani gimin da·o ia neng·nikaniko namatna man·aha,” ineba Marak aganaha.
PHE Minister-ni parakatani gitade, GSWSS Phase III-ni kamrangko matchotna gita sorkari somoirangkode donjaha indiba ia ja·manchakbegipa kamko matchotatna uni department, krenge kamko ka·enga.
GSWSS Phase III-na pangchakaniko a·songni gitcham President Pratibha Patil, 2008 bilsini October 22 tariko songe on·ahachim aro ia scheme-ko PHE department, 2022 bilsini December jaon a·bachengna gita somoiko donahachim.
Ia gong kror 193-ni project-na Jawaharlal Nehru Urban Renewal Mission-ni ning·o ma·mong sorkari tangka paisarangko chame on·ahachim aro ia Mission-ko da·o Atal Mission for Rejuvenation & Urban Transformation ine mingskaahachim.
Shillong songjinmao songdongenggipa manderangna chi on·aniko nambatatna gita a·dok sorkariba gong kror 65-ko ia project-na chamatahachim.