U·IATTIMGIPAONI
SHILLONG: Bristibar salo, a·dokni Chief Minister Conrad K Sangma, skanggipa North East Fruit Wine Incubation Centre-ko Shillong IHM campus-o kulie on·angaha.
Ia incubation centre-ko kuliani bidingo a·dokni Chief Minister, talataniko on·angengon, ia fruit wine incubation centre-ara Tourism aro Agriculture department-ni gisepo bak donggipa ong·e ian bading chiwalgiparangko tang·doatanio aro kamrangko nakatate on·anio bang·en namgnirangko ra·bagen ine parakataha.
“Chu tarianiara an·chingni a·doko songdongenggipa dingtang dingtang jatrangni dakbewal rikbewalan ong·ani gimin ia incubation centre-ko kulianichi chu tarigiparang aro badingenggiparang, nanga dakchakanirangko ra·na man·gnok. An·chingo drakarangoniko chuko taribatrongani gimin ian drakaoniko chu tarina gita niksamsoani gnang cholrangko ra·gatani ong·enga. Chingni miksonganiara Meghalaya a·dokko India a·songo Fruit Wine Capital ong·atanian ong·enga,” ine Sangma aganaha.
Ia Fruit Wine Incubation Centre-ko Meghalaya Farmers Welfare Commission aro IHM Shillong-ni gisepo nangrime a·bachengatahani gimin ian Meghalaya a·doko aro salgro salaram jol gimiko chu tarigiparangnasan ong·aigija bading chiwalgiparangnaba namgni ong·gnok ineba Chief Minister parakataha.
“Da·alo joltango tarigipa churangni namdapanirangko nikna man·e anga namen kusi ong·a. Ia incubation centre-ko kulianichi chu tarigiparang aro game ge·e cha·giparangba bang·en namgnirangko man·gnok,” ine Sangma aganaha.
Photo: North East Fruit Wine Incubation Centre-ko kulie on·angani somoio a·dokni Chief Minister Conrad K Sangma, kobor ra·timgiparang baksa agangrikenga.