U·IATTIMGIPAONI
TURA: Sombar salo, West Garo Hills a·jani ning·o donggipa Dalu police station-ni sipairang, niam gri Bangladesh a·songoni napsrukbagipa sakbri manderangko rim·aha.
Koborko on·ani gitade, ia manderang Sombar pringo India a·songona napsrukbaaha aro Dalugao minggipa songo re·rame roengmitingko police-rang rim·na man·aha.
Ia manderangko police-rang rim·e sing·sandion, uamang Chennai songjinmao kam ka·enga aro da·o West Bengal a·dokni Malda-ona re·angengachim ine police-rangna parakaha.
Ia manderango Aadhar card-rangde dongtokachim indiba uamango ID lekkarangde dongskatokjachim.
Ia manderangoniko police-rang, gong 5000 Indian tangka baksana mobile phone ge·bonga aro PAN card kingsako man·aha.
Rim·ako man·gipa manderangni bimingrangara, Bangladesh Chaipainawabganj songoni bilsi 25 ong·gipa Mohd Mamun Rashid, Bangladesh Chapainawabganj a·jao donggipa Choralatuli songni bilsi 20 ong·gipa Md Wasikul, Bangladesh Rajsai a·jao donggipa Ratahat songni bilsi 21 ong·gipa Siyam Sheikh aro Bangladesh Chapainawabganj a·jao donggipa Bokchar songni bilsi 20 ong·gipa Md Mir Kasim ong·achim.