U·IATTIMGIPAONI
SHILLONG: Meghalaya a·doko National Education Policy (NEP) 2020-ko ra·gatna gita bang·bea korosrangko nanggen ine dingtang dingtang college-rang kenchakenganiko paraktokengon, a·doko NEP-ko ra·gatna gita ma·mong sorkarian, PM-USHA scheme-ni ning·o tangka paisarangko dakchake on·gen ine Mongolbar salo a·dok sorkari parakataha.
“NEP-ko ra·gatna gita ma·mong sorkarichipakni dingtangmancha Prime Minister USHA minggipa scheme donga aro iani bidingo screening aro Meghalaya sorkari baksa MoU-o soi ka·grikaniba matchotmanaha,” ine a·dokni Education Minister Rakkam A Sangma parakataha.
NEP-ko ra·gatanio mai dakgipa neng·nikani aro ra·bianirangko chagrongna siengachim, ia pilakkon ma·sisoe a·dok sorkari, People’s College-ni ning·o ge 500-600 kamrangko nakatataha ineba Sangma parakataha.
NEP-ko ra·gatna agre sikkelenga ine matnangenggipani bidingo aganchakaniko on·angengon, “Mande sakantian skigipa ong·aia maina uamang pilakan chatro chatrirangna maia nambata ukode ma·sitoka. An·ching pilakan chatro chatrirangni namgninasa chanchie kamrangko ka·na nanga,” ine Education Minister aganaha.
NEP-ko jegale dongchaaiode mikkangchi chatro chatrirangsa neng·nikanirangko chagrongna nanggen maina bang·bata college-rangon da·o NEP-ni gita class-rangko a·bachengtokaha ineba Sangma parakataha.
“Lekka porani gadangko tang·doatna gitasa name chanchichengenba NEP-ko ra·gataha indide sawa iako jegalkugen? NEP-ko jegipa mandede dingtanggipasa ong·aignok,” ineba ua aganaha.