U·IATTIMGIPAONI
TURA: Meghalaya a·doko aro mongsongbate South Garo Hills a·jani Nongalbibra jolrango, niam gri koelarangko bikotengkua ine mesokna gita Nongalbibra aro Nongjri-o donggipa Coal India Limited (CIL)-ni depot-rango chimonge donenggipa koelarangni bidingo Siju-Rongara-ni gitcham MLA Rophul S Marak baksana sakgipin Kingston B Marak, Justice Katakey-na seachi badi ka·doataha.
Niam gri koela badinganio saksa George S Marak aro M/s Coal Traders minggipa dolrangan mongsonggiparang ong·a ine matnangatengon, South Garo Hills a·jani Pathargittim aro South West Khasi Hills a·jani Nongjri-o donggipa CIL-ni depot-rango chimonge donenggipa koelarangko re·ange nichina gita uamang, Justice Katakey-ko didiataha.
Ia depot damgnian koelarangko Nongjri aro Gasuapara LCS gita Bangladesh a·songona watatna siengachim.
Nongjri-ni MT 2880 koelarangko salna gita George Marak-na aro Pathargittim depot-ni MT 2616 koelarangko salna gita M/s Coal Traders-na on·skaahachim.
Ia koelarangara ia depot damgnio dongjagenchimoba koelarangko Directorate of Mineral Resources (DMR), George Marak aro M/s Coal Traders-na dakkigaltaiaha ine u·iataha.
“Ia depot damgnio ia koelarangko nikna man·engani gimin South Garo Hills aro South West Khasi Hills a·jani manderang chanchichiptokenga aro uamang an·tangtangni bimingrangko mingna siktokjaengani gimin chinga iani bidingo nang·na u·iatskana tik ka·aha,” ine Justice Katakey-na badi ka·doatgipa chittio uamang parakataha.
Ia depot damgnion DMR-ni agana gita koelarang dongja ine janapatengon, ia biap damgnionan re·ange nichina gita gitcham MLA, Justice Katakey-ko didiataha.
Iandake niam gri koelarangko badingna aro challan-rangko on·engani gimin sorkari officer-rangni kosako rakgipa ja·kurangko de·china gitaba uamang, Justice Katakey-ko didiataha.