U·IATTIMGIPAONI
TURA: Meghalaya a·doko bading chiwalanirangko dake cha·na sikenggipa manderangko dakchakna gita sorkarini a·bachengatgipa CM Elevate program-ko Sukrobar salo, a·dokni Chief Minister Conrad K Sangma, Garo Hills gimikna Tura-ni District Auditorium-o a·bachengate on·angaha.
Ia program-ko ong·atanio a·dokni Chief Minister, jinmana aganprakangengon, CM Elevate program-ni ning·o, bading chiwalgiparangna, self help group (SHG)-rangna aro uandake an·tangtangko dakchakenggipa dingtang dingtang dolrangna 30 percent-oni 75 percent-ona kingking subsidy-rangko on·ani donggen ine parakataha.
Ia CM Elevate program-na sorkari, gong crore 300 tangkarangko chame donaha aro ia program-ni ning·o sak 20,000-mangni gita bading chiwalgiparangko dakchake on·anggen ineba Chief Minister parakataha.
“India a·songo chadamberang bang·en donga aro a·doko bading chiwalani kamrangko tang·doatna gita sorkari, ia CM Elevate program-ko a·bachengataha. Ia program-ni ning·o, scheme-ni niamrango pangchake 75 percent-ona kingking subsidy-rangko on·ani donggen,” ine Sangma aganaha.
Ia program-ni namgniko ra·e, sakgipinrangna janggi tangani cholrangko on·skana man·gipa bading chiwalani kamrangko a·bachengatchina gitaba ua chadamberangko didiangaha.
Ia tom·anio ua sorkarini a·bachengatgipa Yess Meghalaya, Meghalaya Grassroot Music Programme (MGMP), PRIME, Green Meghalaya aro uandakgipa program-rangni giminba jinmana agan-talate on·angaha.
Ia tom·anio, dingtang dingtang songni dolrangna Community Investment Fund-ni ning·o gong crore 1.05 tangkarangko aro Payment for Ecosystem Services-ni ning·o gong 60,98,595 tangkarangkoba Chief Minister suale on·angjolaha aro Yess Meghalaya program-ni ning·o seoka man·gipa manderangnaba skanggipa bakni gong 9,30,000 baksana gnigipa bakni gong 1,40,000 tangkarangkoba suale on·ataha.