U·IATTIMGIPAONI
SHILLONG: Ia chang Cherry Blossom Festival-ko Robibar sal man·chape ong·atengani gimin Ri Bhoi a·jao dingtang dingtang dolrangni nangrime bikotgipa Joint Action Committee (JAC), program-ko dingtang salona ra·dochina dabiangenba, salko dingtangatjagenchimode sorkarini kosako jingjengatanirangko dakanggen ine mikrakataniko on·angaha.
Bristibar salo JAC-ni membor-rang, iani bidingo a·dokni Tourism Minister Paul Lyngdoh-ko grongna jotton ka·ahachim indiba minister kamrang choljokjahani a·sel grongna man·jaha.
Tourism Minister-ko grongna man·jahani gimin suk ong·gijaniko parakatengon, uamang ia program-kode jegalenga ong·ja indiba Robibar salara Kristianrangni rongtalgipa sal ong·ani giminsa ia salo ong·atengani gimin jegalenga ine JAC-ni dilgiparang talataniko on·angaha.
Cherry Blossom Festival-ko Robibar sal man·chape ong·atenganina JAC-ni jingjengatna ka·mikkenatgipa kattarangna aganchakaniko on·angskaengon, iako jegalanio politics-ni gitasa jak dongna nanga ine Tourism Minister Paul Lyngdoh, an·tangni chanchichipenganiko parakataha.
“Jegalnade jekoba man·aia indiba batanggimin somoirango Shillong-o iandakgipa program-rangko Robibar salo ong·ata dongkujama? Ong·ataha ong·ode iako jegalanio politics-ni gita jak donga maina a·doko tourism-ko tang·doatna jotton ka·anio champengenggipa dolrangba donga,” ine Lyngdoh aganaha.
Cherry Blossom Festival-ko ong·atani miksongara iandakgipa festival ba manianirangona re·bagipa 90 percent manderangde gipin a·songrangoni aro gipin a·dokrangoni re·bagipa manderangsa ong·batani gimin ia festival-koba dingtangmancha tourist-rangna miksonge ong·atanisa ong·enga ineba Lyngdoh aganaha.
Ia festival-ko ong·atanio Ri Bhoi a·janaba dingtangmancha sorkari biapko seokmanahani gimin a·jani manderang, dokkanrangko dake aro manderangko salrurae an·tangtangna man·gnirangko ra·rikna cholko man·gen ineba ua aganaha.
“Robibar salo ia program-ko ong·atanina na·simang jegaltokengani gimin Sonibar salo ong·atskaboma? Sonibar salo ong·atgenchimode Seventh Day Adventist-ni manderangara maiko chanchiskagen? Sukrobar salo program-ko ong·atgenchimoba Muslim-rang jegalskagen indide maikai sorkari iandakgipa kamrangko ka·na man·gen?” ine Tourism Minister sing·doataha.