U·IATTIMGIPAONI
SHILLONG: Meghalaya a·doko 108 ambulance service-ko chalaina gita a·dok sorkari, nambatgipa company-kosa seokna sienga aro company-ko seokanio darangba sorkariko didina man·jawa ine a·dokni Health Minister Ampareen Lyngdoh parakataha.
A·doko 108 ambulance service-ko chalaina gita dakkienggipa company-rangoni nambatgipakosa seokna siengani gimin sorkari, somoirangko ra·kuenga ineba ua aganaha.
“108 ambulance service-ko chalaina company-ko seokanio niamrangko ja·rikesa seokenga aro 108 service-ko chalaina dakkienggipa company-rangoni dal·dalgipa company-rang donggenchimoba darangba sorkarini kamo jak dangdikna man·jawa,” ine Lyngdoh, 108 service-ko chalaina company-ko seokanio mitam company-rangna dal·dalgipa manderang dakchake on·enga ine matnanganirangna aganchakaniko on·ataha.
108 ambulance service-ko chalaina company-ko seokanio da·o dipet kamrang ka·sinkuenga ine ku·rachakangengon, company-ko seokanio somoi bang·e nanggenchimoba sorkari, nambatgipa company-kosa seokna nangnikenga ine a·dokni Health Minister parakataha.
Lyngdoh-ni parakatani gitade, NHM-ni director, election-ni kamko ka·na re·angani a·sel kamrang ka·sinbatengachim.
“Ambulance-rangan mandeni janggiko jokatgipa ong·ani gimin chinga a·doko 108 ambulance service-ko chalaina gita nambatgipa company-kosa seokna nangnikenga. Uni gimin company-ko seokanio je gitaba somoiko nangchina ja·mano kamrangsa namna nanga,” ine ua aganaha.