U·IATTIMGIPAONI
SHILLONG: Meghalaya a·dokni dingtang dingtang biaprango dokkan dake cha·enggipa aro dingtang dingtang bading chiwale cha·enggipa manderangoniko niam gri tangka gile ra·anirang batroroenga ine matnanganirangko man·ahani gimin iandake niam gri tangka gile ra·aniko bilakbate nirok sandichina gita a·dok sorkari, dingtang dingtang a·jani deputy commissioner aro superintendent of police (SP)-rangna ge·etaniko on·ataha.
“A·jatangtango niam gri tangka gile ra·anirangko nirokani kamara district administration-ni daitoan ong·a. Iani bidingo dingtangmancha DC aro SP-rangna u·iatanirangko on·manahani gimin uamangan ia daitoko jako ra·e da·o nirok sandianirangko dakanggnok,” ine a·dokni Deputy Chief Minister aro Home Minister Prestone Tynsong parakataha.
Deputy Chief Minister-ni parakatani gitade, dingtang dingtang NGO-rang ba uandakgipa dolrang, deputy commissioner-ni permission-ko man·chenggijade, dokkanrangoni, manderangoniko ba uandake dingtang dingtang bading chiwalgiparangoniko ‘donation’ ine pa·sikenba tangka paisarangko gile ra·na man·jawa.
Bang·bata changon, badiaba badiaba NGO-rangni, dokkan dakenggipa manderangoniko, ‘donation’ ine tangka gile ra·anirangko nikna man·rongengachim.
Koborko on·ani gitade, japrakon dokkan dake cha·enggipa manderang, iandake ‘donation’ ine tangka gilanirangko komibeoba changgittamrangde man·sorongenga aro da·o gita maniani somoirangode tangka gile ra·anirangba batrongachim.