U·IATTIMGIPAONI
TURA: Rongram-oni Phulbari-ona tarianggipa Hill Road-ni mitam bakrangko taria matchotaoni da·o adita salrangsan ong·kuengoba, ia rama da·on nosto ong·na a·bachengengaha ine jolni manderang, ia ramako tarigipa Badri Rai & Company (BRC)-ko matnangataha.
Ia apsan BRC dolni tarigipa gital Assembly-ni protchong aro Tura-o PA Sangma Stadium-ni pakmarangba be·gruahachim aro unbaksana ia company-ni tarigipa Gonglanggre aro Selsella ramarangba ta·raken nosto ong·pilahachim ine nikna man·a.
Kobor on·timgiparangni u·iatani gitade, Rongram-oni Phulbari-ona dakanggipa Hill Road-ni mitam bakrangko jagni ba jagittamskangsan matchotkuaiengachim indiba ia ramarang da·on nosto ong·na a·bachengahachim.
“Ia ramani mitam bakrangko matchotaoni sal 10-ba ong·kujawakon indiba ramako da·on taripilna nangengaha. Ia ramako tarigipa company, rama tariani giminde ma·sigiparangan ong·achimma? Maini a·selsa uamangni kam mingantian indake nosto ong·pilenga?” ine Phulbari-ni saksa Peterjob A Sangma sing·doataha.
Ramarangko tarianio namjani gimin BRC-ko matnangatan baksana ia ramarangko tarianio maming simsak nirokanirang dongjani a·selba ia ramarang da·o ta·raken nosto ong·pilengaha ine ua, PWD-koba matnangataha.
“Ia kamrangara PWD-ni engineer-rangkoba matnanganiona ra·baani gita ong·aha maina ramako tariengmiting somoion PWD-ni official-rang, BRC-ni kamrangko name nirokna gita nangachim,” ine Sangma parakataha.