U·IATTIMGIPAONI
TURA: West Garo Hills a·jani a·kawe jolrango niam gri chalaienggipa saw mill-rangko champengna man·jaengani a·selan Garo Hills-ni bol wa·arang gimaroroangengaha ine jolo songdongenggipa manderang suk ong·gijaniko parakattokaha.
New Bhaitbari jolo songdongenggipa mande saksani parakatani gitade, Bangalkhata minggipa songo niam gri chalaienggipa adita saw mill-rangko kuliahani a·selan ia songni buring bolgrimrang bon·roroangengaha ine ua nikna man·ahachim.
Ia saw mill-rangona salantian dingtang dingtang biaprangoniko bolrangko salbarongenga aro uandaken buring bolgrimrango donggipa bol wa·arang gimaroroangengaha ineba ua parakataha.
“Bol pale cha·enggipa mande sakantide cholgri ong·ana dake cha·giparang ong·ja maina bolrangko palsrukanio songni manderang aro dingtang dingtang dolni manderangba jak donga aro ia manderang bang·gija tangka paisarangnan an·tangtangni buring bolgrimrango donggipa bol wa·arangko, saw mill nokgiparangna pale cha·tokenga. Ia jolrango niam gri chalaienggipa saw mill-rangko chipatna jotton ka·genchimoba ia manderang dingtang dingtang dolrangni chakpaanirangko man·engani gimin champengna gita man·jaenga,” ine Phulbari jolni saksa SR Sangma parakataha.
Sangma-ni parakatani gitade, West Garo Hills a·jani a·kawe jolrango, Tikrikilla-oni Hallidayganj-onan dam 100-na baten niam gri chalaienggipa saw mill-rang donga aro ia saw mill damprakan japrako pang 300 bolrangko ra·angengoba West Garo Hills-o pang 30,000-na baten bolrang gimaangskaengahachim.
“Niam gri bol badingenggipa manderangni a·sel bilsiprakon hajalni hajal bol wa·arang gimaroroangengaha. Ia bol badinggiparang, bil gnanggipa manderang baksa jak dongani gimin darangba uamangni kosako mamingkon dakna man·jaenga. Garo Hills-o forest aro police-rangba niam gri bol badinganiko champengna kamrangkode ka·enga indiba saljrakjrakon bol badinggiparang, jinmani nikchrakaon bolrangko salangna pa·skaengaha,” ine sakgipin PA Sangma parakataha.