TURA: Dama dokatenga, singga sikatenga, jinma knachina, knaako aganrikrikskachina. A·chik a·songo Christian torom nape mondoli ong·chengahaon bebera·giparangni gisepo wa·alko an·tangtango bon·ataina, miksongjaha indiba bebera·giparangni ka·tongrango jatskana aro gipin jatrangna Isolni kattani wal·misiko giproroatna manchiaha aro wa·al gita cha·bakrorobaaha. Mondolirang krimarangko songbaroroaha aro krimarang nangdime ABDK-ko rikaha. 1874 bilsion skanggipa sobako Goalpara, Assamo ka·chengaha. Unoni chanbae re·baenggipa 2024 bilsio ka·nasienggipa soba chang 150gipa gapgnok. Uandake, ABDK re·baenggipa January 31 tarikoni February 4, 2024 tarikrango Sesquicentennial Jubilee-ko maninasienga.
Nitogipa Ranggira A·bidingni Babadam songni sepango donggipa Balupara songni “Bethel A·bri”, jean ABDKni pangkamgipa soba a·dam ong·achim, uano ia dal·begipa maniako sokachakgen. Skanggipao January 31 oni February 2 tarikona ABDKni bilsini tom·bimongani ba Sobani bak ong·gen, jean Mondoli aro Krimarangoni re·bagipa delegate-rangni tom·anisan ong·gen. Jubileeni singgako February 3 tarikni pring 9:30 bajio sike manianiko a·bachengatgen aro salgipino 4 tarikni attamo matchotatgen. ABDKni a·jao donggipa pilak bebera·giparang, jemangan kamo-kattao bak nangpagiparang ong·a uamangko ia dal·begipa manianiona okama. Isolni indita bilsirangna aiao inmana kamrangna ku·cholsan olakkirimani namen gisik ra·beani ong·gen. Jubileeni pangchakaniko Gitrang 126:3-oniko ra·e “Jihova an·chingna dal·a kamrangko ka·aha” ine donaha.
Indita ru·utbee ABDKni janggi tanganio bang·a manderang aro dilgiparang dingtang dingtang mingnama kamrango on·gilangaha. Uarangko bimung mingo gitok ran·changpilgen, mingantiko janapo ku·sik sichangpilgen. Beben basakoba mikka wabea gita pattianirang, basakoba sal-ko·rang onna gita obostarang sokbaa, indiba uarang gimikkon nipile an·chingni nikrangrao darang mandeba rasong chana gri, indiba Isolsan rasong aro bimungko man·na kragipa ong·a. Apsan somoio, ABDK indita sal-karirango janggi tangengon bang·a namarangko manderangna, uamangni gisikni silroroanio; mondolirangna, uamangni krong songe, bilbang gate rikanirango aro songsarni chol-ap nikgijagipa obostarango, gisik rongjriao, chanchibewale ka·gnirango jak on·baaha, dangdik-sachiaha. ABDK-ara pilak Baptist bebera·giparangni, chona-dal·a, kangal cha·sasigipa, nok gadang rikgipa, darangni bakrime rikgipa kotok ong·a. Chona dal·a kam-kattarangko dondime chanchirimna, saksan-ge·san amgijako tom·dake ka·na, dukni wari oSet featured imagendapo bal chilrimpana, bobil chadrapan salo chel·chakgrikna ine kimkro jak on·rimpagipa ge·sa bimangsa ong·a. Indake, ia bilsi 150-ko gisik ra·e maniani a·ding-a·kongoni re·bae, damsan biapo tom·e katchae Isolko olakkirimani ong·gen.
Ia re·baenggipa jubilee-ko maniani Isolni dongpaanio mingsa gisik ra·na krabegipa ong·an baksa ka·tong rongchu su·atgipa, nachil songe, mikron de·chaoe nina sikatgipa programme ong·gen ine nikjagringsona man·a. Dingtang dingtang olakkiani bakrango niksenggipa aro an·tangtangni kamrango gipi ong·gipa dilgiparang Isolni kattarangko skiprakgen. Programme-ko tarion darangan ka·srokchina ine dingtang dingtang choir aro niksenggipa git ring·giparangko tom·anirango donsoenga aro uamangni bak ra·anio darangnan katchabeani aro Isolni aiao inmana pattianirang ong·gen ine niksoa. Unbaksana A·chikrangna Isolni pattigimin jatni dakbewalrangkoba dakmesokanirang donggen.
Jubilee maniaona re·baenggiparangna rama mesoksona, gari parking chame on·sona, biap-bichamrangko noksa tarisona, tik-somoirangko mesokatna, dakgni-ka·gnirangko jinmana u·iatna ine ABDK’ni gita mobile app ge·sakoba tariaha. Ua app-ni bimung “Go Bethel” ine ong·gen. Ru·utgijaan uko taria matchotgen aro jubilee manianio jakkalna man·gen; Google Play Store-niko download ka·e jakkalna man·gen.
