SHILLONG: Meghalaya a·dokni 108 service-o kam ka·enggipa manderangni dabienga gita a·dok sorkaride ambulance service-ko chalaina man·jawa ine Sombar salo, a·dokni Health Minister Ampareen Lyngdoh parakataha.
Sombar salo, 108 service-o kam ka·enggipa manderang baksa Shillong songjinmani Main Secretariat-o tom·e chanchirimangani ja·man kobor ra·timgiparangna talataniko on·angengon, “Ambulance service-ko a·dok sorkaride an·tangari chalaina man·jawa ine anga 108-o kam ka·enggiparangna talate on·aha. Indiba 108 service-ko chinga name chalaina man·gipa company-nasa on·na jotton ka·gen,” ine Lyngdoh parakataha.
Ambulance service-ko National Health Mission (NHM) jako ra·ani ja·man 108-o kam ka·enggipa manderang naljokbate nikenga ine ua an·tangba ma·sienga ineba Health Minister aganaha.
Lyngdoh-ni parakatani gitade, 108 service-o kam ka·enggiparangna dingtang dingtang man·gnirang, jekai casual leave, special leave aro paternal-maternal benefit-rangko on·na man·gipa company-nasa sorkari, 108 service-ko pakwate on·gen.
Ambulance service-ko chalaina gita sorkari, tender on·ani kamko ta·raken matchotatna jotton ka·gen ineba Lyngdoh ku·rachakaniko on·angaha.
“Tender on·ani kamrangko chinga da·o jagittam ba jabrini gisepon matchotatna jotton ka·gnok,” ine ua aganaha.
Indake ong·engon, Health Minister baksa tom·e agangrikanio maming namgnirangko man·jae uamang suk ong·nikjaha ine 108 Emergency Service-ni president Roypar Raswai parakatskaaha.
“Chinga chingni neng·nikanirangko ta·raken namatna man·gen ine sorkarioniko ka·dongsoengachim indiba ambulance service-ko NHM-ni jako ra·chengaoni da·o bilsisa ata ong·pilahaoba chingni nangnikanirangko sorkari on·na man·kujaenga,” ine Raswai aganaha.
Ambulance service-ko chalaianio NHM-an maming neng·nikani gri chalaina man·ahani gimin a·dok sorkariba ambulance service-ko chalaianio maming neng·nikanirang dongna nangjachim ineba ua aganaha.
Ambulance service-ko sorkari an·tangan chalaina nanga ine dabiangengon, “Ambulance service-ko chalaina gita sorkari, emergency cell-ko bikotskana nanga,” ine 108 Emergency Service Union-ni president aganaha.
Da·o dipet 108-o kam ka·enggipa manderang NHM-oniko tik ka·gimin dormahana agre provident fund ba health insurance gita dakgipa man·gnirangko man·tokkujaenga ineba Raswai parakataha.
Indake ong·engon, 108-o kam ka·enggipa manderang baksa a·dokni Health Minister, mikkang antio gronge agangrikangtaigen ine u·iataha.