SHILLONG: Meghalaya a·doko central jail-ko rikna gita a·dok sorkari, biapko tik ka·kuja ine a·dokni Deputy Chief Minister aro Home (Prisons) Minister Sniawbhalang Dhar parakataha.
Dhar-ni aganani gitade, central jail-ko New Shillong Township (NST)-o rikna miksongani dongani gimin Shillong district jail-ko NST-ona apjitna gita skangon, Home (Jail) department aro Urban Affairs department-ni gisepo songgigrike soi ka·grikahachim.
“Indake ong·genchimoba, central jail-ko NST-o rikaniko manderang jegalnaba donga ine central jail-na dingtang biapko sandichina mitam manderang chingko ku·pattiahani gimin da·onan chinga biapko tik ka·na man·kujaenga. Uni gimin central jail-ko songjinmaoni chel·kalao rikna man·na gita chinga bakan biapko tik ka·anggen,” ine ua aganaha.
Dhar-ni aganani gitade, iani bidingo Urban Affairs aro Home department-rang changgittamna kingking tom·e chanchirimenba, NST-o on·enggipa biapna da·o Shillong district jail dakenggipa biapko Urban Affairs department-na on·skana tik ka·angahachim.
Gital Shillong district jail-koba central jail-ni gadango rikgen aro ia jail-o rai man·gimin koidirangko, bichal ka·a man·enggipa koidirangoni ma·ekate dongen ine u·iatengon, gital jail-ko rikna gita komibeoba acre 25 a·arangko nangenga ine Home (Prisons) Minister parakataha.
“Shillong district jail-ko gipin biapona apjitangani ja·man Jail Road-o donggipa a·ako sorkari taridapgnok,” ine ua aganaha.
Shillong district jail-o apchangket ong·aniko komiatna gita Nongstoin jail-ko matchotatchina ua mol·molataha ineba Dhar aganaha.
Jail-rangoni joke kataniko champengna man·na gita Jowai district jail-ko man·chape pilak jail-rangon chel·chakanirangko bilakbatatna nangenggipa report-ko ua bi·ataha ineba Minister aganaha.
Da·o dipet Meghalaya a·doko gimik dambonga district jail-rang, chong·motan Shillong, Williamnagar, Jowai, Tura aro Nongpoh jail-rang donga indiba da·onan central jail dongkujachim ine nikna man·a.
Ia district jail-rango me·asa sak 595 aro me·chik sak 55 koidirangko donchakna biaprang donga.
