TURA: West Garo Hills a·jani a·kawe jolrango niam gri ita karkana aro saw mill ba bol ratani karkana chalaianiko champengna gita Robibar salo, West Garo Hills a·jani Deputy Commissioner Jagdish Chelani, dingtangmancha Section 144 CrPC-ko ra·gatangaha.
Niam gri ita karkana aro saw mill chalaianiko Supreme Court-ba champengatmanaha ine West Garo Hills a·jani a·kawe jolrango niam gri chalaienggipa ita karkana aro saw mill-ko chipatna gita Section 144 CrPC-ko ra·gatchina re·anggipa antion Meghalaya Pollution Control Board (MPCB)-ba ku·pattianiko on·atahachim.
MPCB-ni ku·pattianiko on·ani ja·manba, ia jolrango niam gri chalaienggipa ita karkana aro saw mill-rangko chipna gita maming ja·kurangko de·jaengani gimin ia jolo donggipa dingtang dingtang dolrangba suk ong·gijaniko parakattokahachim.
Indake ong·engon, ia jolrango niam gri chalaienggipa ita karkana aro saw mill-rangko champengna gita dingtangmancha Section 144 CrPC-ko ra·gatahani gimin Garo Hills Youth Organisation (GHYO) dolba kusi ong·aniko parakataha.
Adita salrangna skangsan GHYO-ni dilgiparang, MPBC-ni Member Secretary, West Garo Hills a·jani DC aro SP-naba seadoatenba, West Garo Hills a·jani dingtang dingtang songrang, jekai Sakmal, Ramjonggre, Gorband (Singwilgre), Silkata, Kharigaon aro Sobribari songrango dam 70-na baten ita so·gipa karkanarangko niam gri chalaitokenga ine badi ka·doatahachim.
“Ia ita karkanarangko Forest & Environment Ministry-ni dongimin niamrangko pe·e, olakkichakram, manderangni nokrang, chiring chibisikrang aro uandakgipa biaprangoni metre 5-oni metre 100-ni ning·on chalaitokenga aro ita karkana damsaoni damgipinona komibeoba kilometre 1 chel·grikna nanga ine dongimin niamkoba manijaenga,” ine GHYO-ni president Nazmul Hashan parakataha.
Ia ita karkanarangko niam gri chalaiengani a·sel balwarang moila ong·atako man·engan baksana ita karkanarangko rikna gita niam gri bolrangko den·enga aro a·arangko bakenga ineba GHYO-ni president parakataha.
Ita karkanarangna dal·dalgipa bolrangko salrurarongengani a·sel rama jal·langrangba nosto ong·atako man·tokengaha ine janapatengon, ia ita karkanarangko niam gri bi·sarangkoba kam ka·atenga ine Hashan, official-rangna badi ka·doataha.
Ia jolrango ita karkanarangko niam gri chalaienganichi NGT, MSPCP, Child Labour Act aro uandakgipa dingtang dingtang niamrangko pe·a ga·akenga ine janapatengon, ia jolrango niam gri chalaienggipa ita karkanarangko ta·raken chipatchina gita GHYO didiataha.
Official-rangni u·iatani gitade, ita karkanarangko chalaiengon, manderangni dongchakgipa biaprangoni komibeoba metre 300 chel·na nanga, skul ba health centre-rangoni komibeoba metre 500 chel·na nanga, ita karkana damsaoni damgipinona komibeoba metre 500 chel·grikna nanga, chiring chibisikrangoni komibeoba metre 500 chel·na nanga, ge·a gamanio jakkalenggipa a·a ong·na nangja aro State Pollution Control Board-oniko NOC aro gipin certificate-rangko ra·chengna nangachim.