SHILLONG: International Water Conclave-ko February-ni 9 aro 10 tarikrango, Shillong songjinmani Courtyard by Marriot-o ong·atna siengani gimin ia tom·bimonganiko ong·atna gita Budbar salo, dingtangmancha Shillong songjinmani State Convention Centre-o do·gako osamsoaha aro ia tom·anio, a·dokni Water Resources Minister Comingone Ymbon, mongsonggipa sokgipa ong·e bak ra·angaha.
International Water Conclave-na do·ga osamsoni program-ko ong·atanio, Water Conservation ba chirangko ripingani bidingo painting, quiz aro photo competition-rangko ong·atangaha.
Ia program-ko ong·atanio, a·dokni Water Resources Minister Comingone Ymbon, jinmana aganprakengon, 2040 bilsini gisepo chirangko man·anio neng·nikanirangko chagrongna siengani gimin mikraksamsoataniko on·angenba, mikkangchi chirangko man·anio neng·nikanirangko chagrongna nangjana gita chi jakkalaniko komiatchina, apsan chirangkon dingtang dingtang kamrangna jakkalchina aro samtangtango donggipa chiring chibisik, chima aro pilak cholrangkon simsakchina gita manderangko didiangaha.
Namgipa a·gilsakko ong·atna dingtangmancha ku·mikchetanirangko dakchina chadamberangko didiangengon, ia program-o ong·atgipa dingtang dingtang susaanirango bak ra·gipa chadamberang pilakkon Minister mittelpilangaha.
Iana skang, a·dok sorkarini Additional Chief Secretary Dr Shakil P Ahammed-ba jinmana aganprakangengon, samtangtango ong·telaigiparangko aro chiko ripingna gita gisik nangchina chadamberangko didiangaha.
Pagitcham ma·gitchamrang chirangko ripinge rakkiahani a·selsa da·alo chirangko man·na amenga ine janapatengon, ia sal somoirango a·gilsakko, chirangko aro samtangtango ong·telaigiparangko ripinge rakkijagenchimode mikkangchi re·banasienggipa chasongni manderang namen neng·nikanirangko chagrongna nanggnok ine Ahammed mikrakataniko on·angaha.
