SHILLONG: Bristibar salo, a·dokni skanggipa me·chik Director General of Police (DGP) Idashisha Nongrang, a·dokni manderangko aro dingtang dingtang dolrangko grongna somoi on·ahani gimin Meghalaya a·dokni Akhil Bharatiya Vidyarthi Parishad (ABVP)-ko dilenggiparangba uko grongna cholko man·aha.
DGP-ko grongeanio ABVP-ni state secretary Tengku M Marak, state joint secretary Bomsing Khongtir, NEC-ni membor Promila Tham aro gipin dilgiparangba dongpaaha.
A·dokni skanggipa me·chik DGP-ko grongeanio ABVP-ni dilgiparang, a·doko uamangni jako ra·e ka·enggipa kamrangni gimin agangrikangaha.
Ia tom·anio ABVP-ni state secretary Tengku M Marak, ABVP-ni kamrangni gimin DGP-na talate on·angengon, ABVP-ara a·gilsako dal·batsranggipa chatro chatrirangni dol ong·a aro uamang a·songko rikanio chadamberang aro chatro chatrirangni namgnina kamrangko ka·enga ine parake on·angaha.
ABVP-ni kamrangna a·dokni DGP Idashisha Nongrang-ba mittelpilaniko parakataha aro uamangni kamrango police-rangba bakrimanirangko on·gen ine ku·rachakaniko on·ataha.
