Williamnagar: Williamnagar jilako nambate taridapna kam ka·a adha-ni gitaba matchotgija rama tariako dontonganina ‘A.chik Progressive Approach (APA)’ contractor-ko sing·doangaha.
Williamnagar jilao ramarang gimiko chu·gimik a·kol dake nosto ong·kujana dipet ramrangko aro nalarangko taridapgija galchipe donaia. Silroroanirang tang·dobaenganio ia bilsi rika cho·anirangko dakengaha aro Kusimkolgre gate-oni Petrol pump gita MTC bus stand-ona skang gita ong·gija garirang nambate re·na man·ani ja·manba neng·nikanirangko man·kuenga.
Jilao dakna nanggni rika cho·anirang baksa matchotengaha indiba wachi karini somoio ramarango a·kol dakanio chi bana baksa jilani nitoniko nosto ka·aona sokata. Williamnagar jilako taridapangani antignini gitasan an·saoatangaiaha jensomoio ramarangko gongraken tariangaha indiba mikka balwarangchi pangnajolna nosto ka·angako man·aha.
Iako a·dokni High authority-chi dondipatahama ma salkarirang namjani a·sel dondipatahama ma iako political party-rangni sinjetaniko man·ani a·sel dondipatahama? Indakgipa a·selrangchi dondipatako man·aha ong·ode kam ka·enggipa contractor-ni gita iako mande jinmarangna u·iatna nanga. Iako ong·telaigipa salkarirangni a·sel dondipataha inode ian tol·asa ong·aigen maina a·doko mikkarang sokbana skangan iako dondipataha. Iako mitam political party-chi dondipataha ong·a ong·ode namroro silroroaniko nosto ka·agipa aro namgijako miksonggipa ong·gen jeon a·songni gamjinko mikbokgipa aro bi·sani chanchianiko ranta ka·kuenggipa gita iako changen.
Indakgipa neng·nikanirangna mikraksona champengani ja·kurangko de·na nangchongmota. Komie ja·ku de·ani aro komie gisiko nanganiara mikkangchina re·baenggipa chasongni chadamberangna aro a·dokni silroroaniko aro dal·roroaniko champenggipa gita ong·gen. Bi·sa dake chanchianirangko sambengo dona somoirang re·baaha.
Gisikni tangchaaniko an·ching tangchaatpiltaina somoi re·baaha, mitchigrikaniko gale ku·cholsan ong·ona re·bana, namgipa chanchianiko chasongoni chasongona ra·angrikrikna nangchongmota. Je party jemangan gimik dakgipa namroroani ba tangka paisarangko ong·gija ramao aro kragija jakkalsretanio kam ka·giparangko, tol·e ku·rachakgiparangko, bon·atna chingni re·baaniko parakata ine APA-ni president Francis Marak aganangaha.
