TURA: Bristibar salo, CM-Connect-ni ning·o Block Level Community Interaction Program-ko North Garo Hills a·jani Adokgre songo ong·atangaha aro ia program-ko ong·atanio, a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia program-ko ong·atanio, Assembly-ni Deputy Speaker Timothy D Shira, PHE Minister Marcuise N Marak, Mendipathar-ni MLA Marthon J Sangma, Kharkutta-ni MLA Rupert M Momin, Bajengdoba-ni MLA Pongseng Marak, Mahendraganj MLA Sanjay A Sangma, Salmanpara MLA Ian Botham K Sangma aro dingtang dingtang department-ni official-rangba dongpae bak ra·angtokaha.
Ia program-ko ong·atanio a·dokni Chief Minister, tom·anio bak ra·giparangna aganprakangengon, ia CM-Connect program-ara a·doko songdongenggipa manderangna sorkarini on·kanganiko mesokani ong·enga aro ia program-ni ning·o a·doko songdongenggipa manderang, sorkarini kamrangni bidingo Chief Minister baksa ba dingtang dingtang officer-rang baksa agangrikna man·gen ine talataniko on·angaha.
Sorkarini kamrangko nambate chu·sokatna aro an·tangtangni daitorangko ma·sie manderangna dangdike on·na miksonganio ia program-ko a·bachengataha ineba Chief Minister parakataha.
Ia CM-Connect program-ni ning·o a·dokni manderang, a·dokni Chief Minister aro nangchakegipa official-rang baksa agangrikna cholrangko man·gen aro dingtang dingtang neng·nikanirangko ta·rake namatna gita cholrangko man·gen ineba ua aganaha.
Ia program-ko a·bachengatanichi sorkarini kamrango parake dakani aro kakket ong·ani donggen ineba Chief Minister aganaha.
Ia program-ko ong·atanio jolo songdongenggipa manderang, an·tangtangni neng·nikanirangko aro nanganirangko Chief Minister aro dingtang dingtang officer-rangna u·iatna aro sing·sandie ra·na gitaba cholrangko man·aha.
Ia CM-Connect program-ni ning·o Khasi, Garo aro Jaintia ku·sikrangko man·chape gimik mingbonga ku·sikrangchi sorkari baksa agangrikna cholko on·enga aro iana dingtangmancha pring 8:00 bajioni attam 8:00 bajiona 1971 helpline nombor-ko donmanaha.
