TURA: Jebalgre songo Jal Jeevan Mission (JJM)-ni kamko matchotgija tol·e report-ko on·aha ine matnangenba, Aiok M Sangma minggipa contractor-ni kosako Tura-ni MDC aro BJP-ni state vice president Bernard N Marak, West Garo Hills a·jani Superintendent of Police (SP)-na FIR ka·doangaha.
Marak-ni FIR-o parakani gitade, ia contractor-ara Gambegre-ni gitcham MLA aro Tura-ni gital MP Saleng A Sangma-na kam dakchake on·gipa mande ong·achim aro una ia kamko 2022 bilsio PHE department on·ahachim.
“Ia contractor-ni kosako anga badi ka·na nangnika maina ua Jebalgre songo JJM-ni kamko matchotgija ma·mong sorkarina tol·gipa report-ko on·e songni manderangko togiaha. Ia project-ni ning·o Jebalgre, Dikkimpara, Dopogre aro Dosagre songrangko man·chapachim aro uni project-o ua 60 percent kamrangko matchotaha ine tol·e report-ko tarie on·aha. Kakketode ia songrango chi pipe-rangkoba soke man·tokkuja aro chirangkode da·onan man·srangkujaenga,” ine Tura MDC parakataha.
Marak-ni parakatani gitade, ia songrango chi pipe-rangko chu·gimik chate on·manaha ine ia contractor-ni report-o parakahachim indiba ia songrango chi pipe-rangkon nikna man·skakujaengachim.
“Kamko ta·rakatchina aro somoi gita matchotatchina PHE department, ia contractor-na u·iatanirangko on·ahaoba ua department-na nachil songjaha. Mikkangchi JJM-ni kamko ka·enggipa contractor-rang iandake kamtangko nichanggaljachina gita ia contractor-ni kosako badi ka·aniko segatchina anga didienga,” ine West Garo Hills SP-na sedoatgipa chittio BJP-ni state vice president parakataha.
Marak-ni parakatani gitade, ia contractor-ni ma·mong sorkarina on·atgipa completion report-o Jebalgre songo chu·gimik nokdangrangna chi pipe-ko sale on·manaha, Dopogre-o te 78-oni te 61 nokrangna chi pipe-ko sale on·manaha, Dosagre songo te 72-oni te 63-na chi pipe-rangko sale on·manaha aro Dikkimpara songoba ge 69-oni te 62 nokdangrangna chi pipe-rangko sale on·manaha ine parakahachim indiba ia pilakan uni tol·e tarigipa report-san ong·aiachim.
“Ia songrango chi pipe-rangkon man·tokkujaenga aro da·alona kingkingan ringani chirangko man·tokkujaengani gimin ian JJM-ni nokdang ge·antina chi sale on·na miksonganiko pe·ani gita ong·enga,” ine Tura MDC parakataha.
Gipin songrangoniba apsan dakgipa badi ka·anirangko ua man·soenga aro mikkangchiba ua tol·gipa contractor-rangni kosako FIR ka·angkugen ineba Marak parakataha.