SHILLONG: Gipin a·songrango so·sojengjeng ong·anirangchi ua a·songrango songdongenggipa Khasi, Garo aro Jaintiarang, Meghalaya a·doko katnapna nanggenchimode, ia jatrangko a·doko nokchakna gita nanga ine a·dokni Education Minister Rakkam Sangma aganaha.
Sangma-ni aganani gitade, uni Siju-Rongara constituency-ba Bangladesh a·song baksa kilometer 80-mangni gita simarang donga aro da·o Bangladesh a·songo so·sojengjeng ong·engani gimin ia biaprangonaba Bangladesh a·songoni katnapani cholrang dongachim.
Bangladesh a·songo ong·enggipa obostana an·tangni suk ong·gijaniko parakatengon, Bangladesh a·songo songdongenggipa Khasi, Garo aro Jaintiarang bang·en dongani gimin ia jatrangko Meghalaya a·doko nokchakna gita India sorkari baksa agangrikna nangenga ine Education Minister aganaha.
“Ia manderangara an·chingni bakdrangrangan ong·a aro a·songni simachisan an·ching ma·ekgrikatako man·giparang ong·a. Uamangba an·chingni manderangan ong·ani gimin uamangko nokchakna gita chanchirimanirangko dakna nangenga,” ine ua aganaha.
Bangladesh a·songo ong·enggipa obostara a·songna namen ra·biani ong·enga ine janapatengon, iani bidingo India sorkari baksa agangrikchina ua a·dokni Chief Minister baksa agangrikgen ine Sangma parakataha.
“An·chingni dakchakanirangko nangenggipa manderangna dakchakanirangko on·anichi an·ching maming papko ka·jawa. Uni gimin Bangladesh a·songni Khasi, Jaintia aro Garorang, Meghalaya a·doko ma·chakna nangnikenga ong·ode an·ching uamangko nokchakna man·o nambata,” ine Sangma aganaha.
Gipin a·songni manderangko nokchakengon, uan toromni gita ong·na nangskaja ineba ua talataniko on·angaha.
1971 bilsini Bangladesh War-o dakgrikgipa sipairangni nokdangrangna sorkarini kamrangko 30 percent chamna tik ka·aniko jegale so·sojengjeng ong·anio ritchani ritcha manderang sina nangahachim aro uandaken bon·kamao Bangladesh a·songni Prime Minister Sheikh Hasina, manderangni sinjetanirangko amchakjae, Sombar salon kamtangko watenba Bangladesh a·songoni katangahachim.
Bangladesh a·songo iandake so·sojengjeng ong·engani gimin a·song damgnini simarango BSF dolni gitaba chel·chakanirangko bariataha.