SHILLONG: Mumbai Trans Harbour Link-ni ja·man, Assam-oni Garo Hills-ona taribaenggipa Dhubri-Phulbari dolongan India a·songo ro·batsranggipa dolongrangoni gnigipa ong·gen aro ian Garo Hills-nasan ong·aigija Meghalaya a·dok gimiknan namgni ong·gen ine Budbar salo, a·dokni Cabinet Minister aro Phulbari-ni MLA AT Mondal parakataha.
Dhubri-oni Phulbari-ona taribaenggipa dolongko 2028 bilsio matchotna sienga aro ia kilometer 19 ong·gipa dolongko matchotna gita da·o kamrangko ka·chichaengahachim.
Indake ong·engon, ia dolongko rikmanahaon Garo Hills-osan ong·aigija Meghalaya a·dok gimikon bading chiwalanirang tang·dona gita ka·dongenga aro ia dolongko rikanichi North Bengal-ona kilometer 50-mangni gita bakkandikbatgnok ine Mondal parakataha.
Ia dolongko matchotahaode, Siliguri-onaba konta 5 ba konta 6-mangsan nangaignok ineba ua aganaha.
Dhubri-oni Phulbari-ona taribaenggipa dolongko rikna gita 2019-2020 bilsirango a·bachengahachim aro ian Dhubri-oni Tura, Nongstoin aro a·dokni gipin biaprangonaba rama gita songreani chol ong·gnok.
Ia dolongko gong kror 4,997 korosrangchi rikenga aro ian chibima dilgniko chobate songrena nanggipa Assam aro Meghalaya a·dokni manderangna namgni ong·gnok.
Indake ong·engon, Mahendraganj-oni Bangladesh a·songni Hilli-oni a·dok sorkari, gari rama aro rel ramarangko tarina jotton ka·enga ineba a·dokni Cabinet Minister AT Mondal parakataha.
Mondal-ni aganani gitade, iani bidingo a·dok sorkari agangrikanirangko dakengaha aro ia project-ko chu·sokatna man·ahaode salgro salaram jol gimikan ia ramarang gita Kolkata-ona re·na man·e sepangbatgnok.