SHILLONG: National People’s Party (NPP)-ni dilgiparang baksa meliaiani gimin Meghalaya Pradesh Congress Committee (MPCC)-ni president Vincent H Pala-ko ra·galchina dabianiara kraani ong·ja ine MPCC-ni working president PN Syiem parakataha.
“Iandake chonbegipa a·selni bidingo MPCC-ni president-ko ra·galna miksonganiara kraani ong·ja aro ra·chakna man·gijaniba ong·a. Pala-ni NPP baksa melianichi Congress dolna maming nangchakeanirangko ra·bajaenga ong·ode iako pa·sike uko ra·galna jotton ka·aniara kraani ong·jawa,” ine Syiem, kobor ra·timgiparangna aganaha.
April jao ong·atanggipa Shillong Lok Sabha constituency-o amako man·anina Pala saksankode matnangna man·jawa aro iana Congress dolni pilak dilgiparangan daiko ra·na nanga ineba ua aganaha.
Syiem-ni aganani gitade, Lok Sabha election-o Congress dol, Tura parliamentary seat-ode chu·sokgipa ong·na man·ahani gimin Shillong parliamentary constituency-o amako man·anina Pala saksankode matnangna man·jawa.
Pala-na dongimin somoi da·o bon·na siengaha ine gisik ra·ataniko on·angengon, “ Pala-ko basako MPCC-ni president-na AICC songachim anga somoiko name gisik ra·jaha indiba una dongimin somoi bon·engaha ong·ode MPCC-ni gital president-ko songna AICC-ni dilgiparangan jako ra·aigen,” ine MPCC-ni working president parakataha.
MPCC-ni president Vincent H Pala-ni kamo kusi ong·tokjaengani gimin mitam dilgiparang, uko ra·gale sakgipinko songskana miksongenga ine adita salrangna skangsan jangbingbanganirangko knasona man·ahachim.
MPCC president-ni NPP-ni dilgiparang baksa melianina Congress dolni mitam dilgiparang suk ong·tokjaenga ineba kobor on·ahachim.
Mitam dilgiparangni u·iatani gitade, MPCC-ni president Vincent H Pala aro NPP-ni national president Conrad K Sangma-ni gisepo meli nangrimaniko da·o Congress dolni pilak dilgiparangan ma·sitokahachim.
Re·anggipa April jao ong·atanggipa Lok Sabha election-o Shillong parliamentary constituency-oni amako man·ani ja·mansa Pala-ni NPP baksa melianiko ma·sina man·bataha ineba Congress dolni mitam dilgiparang aganaha.
Ia dilgiparangni a·kangatani gitade, MPCC-ni president da·o doltangni kamrangon bang·e gisik nangjaengahachim.
MPCC-ni president Vincent Pala, an·tangni bading chiwalanirangnasa gisik on·batengahani gimin bang·bata changon ua Delhi-osa ong·batenga ineba Congress dolni mitam dilgiparang aganaha.
“District Council election-o aro 2028 bilsini Assembly election-oba NPP baksa susanagipa dolde Congress dolmangmangsan ong·aia,” ine ia dilgiparang aganaha.
Pala-ni bilsi gittamna MPCC-ni president ong·ani da·o re·baenggipa September jaon bon·engahachim ine nikna man·a.