SHILLONG: Bangladesh a·songo so·sojengjeng ong·engani gimin ma·brangenggipa Tribal-rangko a·doko adita salrangna nokchakchina sorkariko diditokengon, da·o dipet a·song damgnini simarang gita Bangladesh-oni katnapbagiparang dongkujaenga aro niam gri katnapna jotton ka·giparangko sipai dolrang mikrake nirikkiengani gimin niam gri napsrukbana jotton ka·giparang donggenchimode rakgipa sastirangko on·gen ine a·dokni Deputy Chief Minister aro Home Minister Prestone Tynsong parakataha.
Da·o dipet Bangladesh a·song baksa nangchapgipa simarango tom·tomanirangko nikna man·kuenga ine janapatengon, “Da·al attamona kingkingde ia sima jolrango obostarang namkuaienga aro darangba Meghalaya a·dokona niam gri napsrukbana man·jana gita BSF sipai dol, district administration baksa nangrime kamko ka·enga,” ine Bristibar salo, Tynsong parakataha.
“Indake ong·genchimoba, mitam manderang India a·songona niam gri napdrabana jotton ka·ahachim indiba uamangko BSF dolni sipairang, dingtang dingtang songni manderang baksa champengsona man·aha,” ineba Tynsong aganaha.
Tynsong-ni parakatani gitade, sima jolrango donggipa dingtang dingtang songni dilgiparang, ta·raken BSF aro district administration-na kobor on·ahani gimin niam gri napdrabana jotton ka·enggipa manderangko champengsona man·aha.
A·song damgnini simarango fencing kakugijagipa biaprangni gimin sing·anina aganchakaniko on·angengon, “Fencing kagimin aro kagijagipa pilak biaprangon sorkari, sipai dolrangko bang·en dondapataha,” ine Home Minister parakataha.
“Angni mongsonggipa daitoan India a·songona niam gri napsrukbaaniko champengani ong·a,” ine ua aganaha.
Sima jolrango tom·tomaniko rakkina gita BSF, a·dokni Police aro district administration, songni nokni dilgiparang baksa koborrangko ra·grike kamko ka·enga ineba ua aganaha.
Sima jolrangko ua an·tangba re·ange niegenma ine sing·anina aganchakaniko on·angskaengon, “So·sojengjeng ong·anide a·songni nalsaosa aro an·chingchipakde maming so·sojengjeng ong·anirang dongkuja indiba sima jolrango mikrakbate kamko ka·china sorkari, pilak BSF official-rang SP-rang, OC-rang aro district administration-na ge·etaniko on·atmanaha,” ine a·dokni Deputy CM aro Home Minister parakataha.
Bangladesh a·songo songdongenggipa Garo, Khasi aro Jaintiarangni bidingo janapatengon, “Koborrangko man·soani gitade, uamang pilakan da·o dipet naljoken dongtokenga aro uamangni kosako sinjetanirangko knasona man·kuja,” ine Tynsong aganaha.