SHILLONG: National Institutional Ranking Framework (NIRF) 2024-o seoka man·gipa dam 100 University-rango North-Eastern Hill University (NEHU)-de biapko man·rikpajahani gimin iani bidingo ua NEHU-ni Vice Chancellor baksa agangrike a·selrangko nianggen ine a·dokni Education Minister Rakkam A Sangma parakataha.
Ia 2024 bilsini NIRF-o nambatsranggipa dam 100 University-rango NEHU-ni biapko man·rikpajahani gimin an·tangni suk ong·gijaniko parakatengon, a·dokni Tribal chatro chatrirangni gisepo susagrikna skani gisikrang dongja aro University-ni performance-ko namdapatna gitade skanggipa chatro chatrirangni gisikrangkoba namdapatchina nanggen ine Education Minister aganaha.
NEHU-ni performance-ko namdapatenba ja·mano NIRF-ni ranking-o tang·doatna man·aigen indiba NEHU-ni mitam department-rang tang·dona nangenga ineba ua aganaha.
“Indake ong·genchimoba iani gimin NEHU-o skie on·ani gadangrang tang·onangaha ine darangba aganna man·jawa maina lekka porako on·aniode Meghalaya a·dokba gipinrangna komibatgipa ong·ja,” ine Education Minister aganaha.
Assam-o chi banatenggipa ine adita salrangna skang, Assam Chief Minister Himanta Biswa Sarma-ni University of Science & Technology Meghalaya (USTM)-ko matnange agangipani bidingoba ua mamingkoba aganna jechakaha.