SHILLONG: Sorkari, a·dokni health sector-ko namdapatna ja·ku de·anio chu·gimik budget-oni 9 %-ko health sector-na chamaha ine Chief Minister Conrad K. Sangma aganaha.
Ganesh Das Government Maternal and Child Health Hospital, Shillong-o Babies’ Critical Care Unit (SNCU, NICU & MNCU)-ko a·bachengate on·angao Chief Minister ia kattarangko parakataha.
Programo bakko ra·mitingo CM Conrad, indine aganaha, “sorkari, health sector-ko bilakbatatna raken jotton ka·enga aro sorkarini chamgipa percentage-ara namen dal·bea, ian sorkarini medical aro health-ko skang done kam ka·aniko mesoka. Iarangni gisepon sorkari Shillong Medical College-ko mikkang bilsi 2025-ode a·bachengna jotton ka·enga. Minggipin state-of-the-art facilities -ICU, operating theater ba uandakgiparangko namdapatna bang·en investmentrangko ka·aha, National Medical Council (NMC)-ni dongimin standard-ko chu·sokatna sorkari kam ka·enga.”
MBBS student-rangni skanggipa batch, mikkang bilsi 2025-onide uamangni poraianiko a·bachengna man·gnok ine ka·dongsoenga aro sorkari, Tura Medical College-koba bilsi 2026-onide a·bachengna miksongenga. Re·baenggipa bilsigni somoirangode an·chingni an·tangni ge·gni medical college donggnok, ian a·dokni health sector-na dal·bea dingtanganiko ra·bagen ine CM aganaha.
Indake ong·engon program-o Health Minister Ampareen Lyngdoh-ba bakko ra·aha. Unomiting contractual health staff-rangni giminba aganangaha unbaksana a·dokni doctor-rangko a·doktangon donge kam ka·china didiangaha.
