TURA: Re·anggipa August 5 tarikoni August 16 tarikona Central Agriculture University (Imphal)-ni ning·o donggipa Tura-ni College of Community Science (CCS)-o ‘Processing & Value Addition of Banana Psedostem Fibres’-ni bidingo vocational training program-ko sal 10-na ong·atangaha.
Ia training program-ko college-ni Textile & Apparel Designing Department, ICAR-NINFET Kolkata-ni dakchakanichi, ‘Strengthening Livelihood Opportunities for Farmers of Garo Hills in Meghalaya Through Processing and Value Addition of Non-Conventional Fibres’ project-ni ning·o ong·ataha.
Ia training program-ko a·bachengatanio college-ni Dean aro ia program-ko ong·atgipa Dr Jyoti V Vastrad, ia program-o bak ra·enggipa sakantikon gisiko nange skie ra·china didianiko on·angaha.
Ia training program-ni valedictory function-ko August-ni 17 tariko ong·atskaaha aro ia program-ko ong·atanio, Meghalaya sorkarini ning·o donggipa Prime Rural-ni Project Lead Minha Riyaz Khan, mongsonggipa sokgipa ong·e bakko ra·angenba, ia training program-o skie ra·anggipa manderangna certificate-rangko suale on·angaha.
Ia training program-o skie ra·gipa manderangko bading chiwale cha·china didiangengon, Prime Rural-ni gita on·enggipa namgnirangko uamangnaba on·na gita ua ku·rachakaniko on·angaha.
Meghalaya a·doko te·rikrang bang·ani gimin te·rik pangrangoniko bang·en namgnirangko ra·na man·gen ineba ua aganaha.
