SHILLONG: Lok Sabha-ni gitcham Speaker aro Tura-ni gitcham MP Purno A Sangma sagini nokdangonin sakgni minister ong·pilahaoba Gambegre Assembly constituency-nade maming namroro silroroaniko ra·bana gisik nangjaha ine Tura-ni gital MP Saleng A Sangma matnangataha.
Gambegre by-election-na campaign ka·engmiting somoirango, Gambegre constituency-na maming namroro silroroaniko ra·bajaha ine NPP-ni dilgiparang uko matnangahani gimin ua Purno Sangma-ni nokdangko matnangatskaaha.
Iani bidingo kobor ra·timgipa manderang baksa agangrikengon, una skang PA Sangma sagini ma·drangrangonin Admiral K Sangma-sa Gambegre constituency-ni MLA ong·ahachim aro ua somoio PA Sangma sagi an·tangan Union Cabinet Minister-ba ong·ahachim ine Saleng parakataha.
Batanggimin bilsi 15-ni gisepo ua an·tangan Purno Sangma sagini nokdangna batede Gambegre constituency-na kamrangko ka·bataha ine janapatskaengon, uni constituency-ni ning·o bang·bata ramarangan black top ka·gipa ramarang ong·jachim ine Saleng parakataha.
“Ua somoio Doldegre jolrango ramaba dongjachim aro hanging bridge-mangmangsan dongaiachim. Ua somoio Purno Sangma sagian Chief Minister ong·engmitingchim,” ine Saleng aganenba, Gambegre constituency-na PA Sangma sagini nokdangde mamingkon dakjaha indiba ua an·tangde ia constituency-o namroro silroroaniko ra·bana jotton ka·aha ine parakataha.
Badiaba biaprangode ua bilsi 10 aro badiaba biaprangode ua bilsi 15-na dangdike on·na man·aha ine janapatengon, Gambegre constituency-o skulrangan dongjachim indiba da·ode residential skulrang aro Pine Mount International School-ba dongpaaha ine Saleng parakataha.
“Chinga Gambegre-na rehabilitation centre-koba man·baengahachim indiba Purno Sangma-ni depante James Sangma, uko an·tangni constituency-ona ra·draangskaaha,” ine Saleng aganenba, Gambegre constituency-o da·ode game ge·e cha·giparangni palram sim·ram, CHC, block, zipline aro gym-ba dongpilaha ine parakataha.
Gambegre constituency-o namroro silroroani dongjani gimin uko matnangna skang constituency-ni itihasko niatchengchina NPP-ko didiatengon, uni MLA ong·e re·bachengani somoio Gambegre-o graduate ong·giparangan dongjachim indiba da·alo hajalni hajal graduate-rangba dongaha ine Tura-ni gital MP parakataha.
By-election-na skang Gambegre constituency-na a·dok sorkarini dingtang dingtang project-rangko ra·gate on·engani gimin janapatskaengon, Gambegre-o gitan dingtang dingtang constituency-rangoba NPP-ni MLA-rang sorkarini scheme aro project-rangko man·tokjaenga ine Saleng parakataha.