SHILLONG: Mongolbar salo, a·dokni Chief Minister Conrad K Sangma, Barik point-o chue kadegipa a·songni nisanko songdoe on·angaha aro apsan somoion, Barik Point-ko taridapna gita master plan-koba oprake on·angjolaha.
Ia nisanni bakroaniara metre 40 ong·a aro chuaniara feet 130 ong·e da·o dipet Meghalaya a·doko chubatsranggipa a·songni nisan ong·aha. Ia Barik point-ko taridapanio, Pedestrian Plaza, Open ground, Stepped Plaza, Civil Hospital-oni ja·achi re·enggipa manderangna rama, Taxi terminal, parking, Drop off court, bi·sarangna kal·chakani gnang restaurant, workshop area, garirang napani aro ong·katani donggen.
Ia nisanko songdoe on·anganio aro master plan-ko oprake on·anganio a·dokni Chief Minister, jinmana aganprakangengon, ia project-na gong kror 25 tangkarangko chamaha aro kamrangko October ba November jani a·bachengachibara a·bachengatgnok ine parakataha.
Ian a·doknisan ong·aigija a·song gimikni ku·mong nangrimaniko mesokani nisan ong·gen ineba Sangma aganaha.
A·doko dingtang dingtang jatrang ku·mong nangrime songdong a·chatokengani gimin Barik Point-ko kragipa bimingchi mingsrena sorkari chanchianggen ineba Chief Minister parakataha.