SHILLONG: Meghalaya a·doko gro jinang batroroengani a·sel mikkangchi neng·nikanirangko chagrongna nangani cholrang donga ine Comptroller & Audit General (CAG)-ni mikrakataniko on·angani ja·man iako a·dok sorkari jegalatskaaha.
Iani bidingo aganchakaniko on·atengon, ia grorangara, a·dokni dal·roroanina jakkalgipa manderangni tangka paisarangsa ong·a aro iako pilak a·songrangon jakkalenga ine Sombar salo, Finance department-ni Commissioner & Secretary Vijay Kumar parakataha.
“A·dokni ra·srona dongimin ariko India sorkarisa tik ka·ani gimin darang a·dokan ia arina batede tangka paisarangko ra·srona man·ja. Ia ra·srogimin tangka paisarangko dingtang dingtang nanga kamrangnasa simsake jakkalenga. Uni giminsa a·dok sorkari, koros ka·ani tangka paisarangko bariatna gita bilsi 50-na sudgrigipa loan-o pangchakenga,” ine Kumar parakataha.
Capital expenditure-ni gimin janapatengon, 2018-19 bilsio gong kror 1903-oni 2022-2023 bilsio gong kror 3362-ona tang·doangaha aro ia grorangara Meghalaya a·dokni mikkangchina koros ka·anisa aro neng·nikani ong·ja ine ra·na nanga ine Finance department-ni Commissioner & Secretary parakataha.
Kumar-ni parakatani gitade, Outstanding Debt (OD)-ara 2018-19 bilsio GSDP-oni 32.22% ong·skaachim aro ian 2022-23 bilsiode 43.19%-ona bariangskaahachim.
Bilsi 50-na sudgri ma·mong sorkarini on·enggipa loan-ko CAG loan gita changenchimoba ian gro nangani dongjawa ineba Kumar-ni see u·iatanio parakaha.
“Ian a·dokrangni koros ka·anio pangchake on·gipasa ong·a aro kamni krisa a·dokrangna on·a. Meghalaya a·doko SASCI-ko name jakkalenga aro uandaken ma·mong sorkarini chamatgipa tangka paisarang, 2020-21 bilsio gong kror 200 aro 2021-22 bilsio gong kror 281-oni 2022-23 bilsio gong kror 1049 aro 2023-24 bilsio gong kror 1293-ona bariangaha,” ine Finance department-oni seachi parakataha.
2024-25 bilsiode ma·mong sorkarini chamatenggipa tangka paisarang gong kror 2,085-ona tang·doangna ka·dongsoenga ineba Finance department-ni Commissioner & Secretary seachi parakataha.