TURA: Re·anggipa Sukrobar pringo, mikkarang dontonggija waanganio, South Garo Hills a·jani Atisia Songmong songo a·a be·dapa man·gipa nokdang ge·sani gimik saksnini manggisirangkon Sombar salo bon·e man·tokaha.
Ia saksnioni sakdokni manggisirangkode Robibar salpakasaon man·aha aro bon·kamgipa mandeni manggisiko Sombar salo, a·dubekoniko ra·ongkatna man·aha.
Sombar salo ra·ongkatna man·gipa mandeara, ia nokdangni ma·gipa ong·achim aro uan bilsi 60-mang ong·gipa Silje R Marak ong·achim.
Re·anggipa Bristibar salonin dontonggija mikkarang waangani ja·man Sukrobar pringo ia Atisia Songmong songo nokdang ge·sani saksni manderangko a·a be·dapahachim.
Ia nokdangni manderangko a·a be·dapani ja·man NDRF, SDRF, Meghalaya Police, BSF aro songni manderangko man·chape sak 80-na baten dakchakgipa manderang a·dubekrangoniko sandina a·bachengaha.
Indita salrangna sandiani ja·man ia saksni manderangoni sakdokni manggisikode Robibar salpaksachibara, a·dubekoniko man·aha aro saksani manggisikoba Sombar pringo man·aha.
Ia mande saksnini manggisirangko man·ani ja·man songo dingtangmancha jinma bi·aniko dakenba, uamangni nok sambaon mandera·a gopaha ine u·iataha.
