SHILLONG: Re·baenggipa November 13 tariko ong·atenggipa Gambegre by-election-o National People’s Party (NPP)-ni candidate-na pu·onjagenchimode dingtang dingtang scheme aro MGNREGA-ni hajirarangko man·jawa ine NPP-ni dilgiparang, constituency-ni manderangko ka·mikkenatenga ine Bharatiya Janata Party (BJP) matnangataha.
“Bang·a Gram Panchayat-rangon MGNREGA-ni hajirarangko ruling party-ni membor ong·gipa dingtang dingtang block-ni chairman-rang dontongataha ine kobor man·soaha aro ia Panchayat-rangni secretary-rangba election gri songako man·giparangsa ong·e iani bidingo badi ka·tokjaenga,” ine BJP-ni state vice president aro Gambegre by-election-ni BJP candidate Bernard N Marak parakataha.
Marak-ni parakatani gitade, Gambegre constituency-ni manderang, NPP-ni candidate-na pu·onjagenchimode PMAY aro JJM gita dakgipa scheme-rangkoba den·galgen ine NPP-ni dilgiparang, songni manderangko ka·mikkenatenga.
“MGNREGA-ni hajirarangko ma·mong sorkari watatjaenga ineba uamang (NPP) tol·enga aro ian ma·mongo BJP sorkariko tol·e biming man·atna jotton ka·anisa ong·enga,” ine Marak parakataha.
Gambegre constituency-o songdongenggipa manderangni man·gnirangko ru·uta bilsirangonin ra·sekaha ine janapatengon, iani giminsa BJP, tangka paisa jakkalsretaniko bon·atna, namroro silroroani aro lekka poraniko tang·doatna ia by-election-o susaenga ine BJP candidate parakataha.
“Chinga pangnan tangka paisa jakkalsretaniko bon·atna kam ka·enga aro ru·uta bilsirangonin songni manderangko cha·bokahani gimin chinga iakon mikkango done kam ka·angkugen. Ma·mong sorkarini pilak scheme-rangkon man·na nanggipa manderangona sokatchina gita a·dok sorkarina niam aro ge·etanirangko on·manahaoba songni bang·a manderangan ia scheme-rangko man·tokjaenga,” ine Marak parakataha.
CGI sheet ba nokking pinani tinrangko ma·mong sorkari, BPL nokdangrangnasa miksonge on·atahachim indiba Gambegre-ode ia CGI sheet-rangko badiaba political party-ni manderangnasa on·skaaha ineba BJP-ni state vice president parakataha.
Gambegre constituency-o pilakni gitan namroro silroroani dongkujaenga ine janapatengon, “Gitcham MLA-rang, Gambegre constituency-ni manderangna ringani chi, an·seng baljokani aro lekka poranio maming dakchakanirangko on·jaha,” ine Marak parakataha.