TURA: Manipur a·doko Bharatiya Janata Party (BJP)-chi chalaienggipa sorkario bakrimaniko National People’s Party (NPP)-ni ra·pilaniara manderangna dakmesokanisan ong·aia ine Sombar salo, Tura-ni MDC aro BJP-ni state vice president Bernard N Marak matnangataha.
“NPP-ni dakmesokaniara, uamangni watanganichi BJP sorkari be·gruaha ine mesokna jotton ka·anisa ong·enga indiba NPP-ni bakrimaniko ra·pilanichi BJP-na maming nangchakeanian dongjawa. Manipur-o NPP-ni bakrimaniko dal·eba ra·ja maina uamangni bakrimaniko nangana nangjachim,” ine Marak parakataha.
Manipur-o BJP sorkarini bak ong·pana gitasa a·bachengonin NPP bakrimaniko on·paaha ine janapatskaengon, NPP-ni an·pilaniko uamang a·bachengonin ma·sisoachim ine BJP Meghalaya-ni vice president parakataha.
“Uamang (NPP)-ni bakrimani griba BJP sorkariko chalaina man·aigen aro chu·sokgipa ong·aigen. An·tangtangni man·gninasan uamang (NPP) BJP-na bakrimaniko on·aia indiba NPP-ni cha·bokaniranga chansokpilgija ong·aha,” ine Marak parakataha.
Manipur a·doko so·sojengjeng ong·anirangko namatchipna man·jaenga ine Manipur a·doko Chief Minister Biren Singh-chi dilenggipa sorkario bakrimaniko ra·pilna gita Robibar salo, National People’s Party (NPP) tik ka·angahachim.
Iani bidingo BJP-ni national president Jagat Prakash Nadda-na seachi u·iatengon, Manipur a·doko obostarang namjabatroroengani gimin uamang suk ong·nikjae, Manipur-o Biren Singh-chi dilenggipa sorkario bakrimaniko ra·pilna tik ka·aha ine NPP-ni national president Conrad K Sangma parakatahachim.
Manipur a·doko ong·enggipa golmalrangko namatanio aro tom·tomaniko ra·bapilanio Manipur a·dokni Chief Minister Biren Singh-ni dilanichi a·dok sorkari chu·sokgipa ong·jaha ineba NPP-ni national president matnangataha.
 |
ReplyForward
|