SHILLONG: Mongolbar salo, a·dok sorkarini Chief Secretary DP Wahlang, North Eastern Hill University (NEHU)-o okumu chake jingjengatenggipa chatro chatrirangko grongenba, uamangni okumu chake jingjengataniko dontongchina mol·molangaha.
NEHU-ni chatro chatrirangko grongeanio Chief Secretary baksana a·dokni Director General of Police (DGP) Idashisha Nongrang aro East Khasi Hills a·jani Deputy Commissioner RM Kurbah-ba dongpaaha.
NEHU-ni Vice Chancellor Prof Prabha Shankar Shukla-ko kam watchina aro University-ni Registrar baksana Deputy Registrar-ko kam ra·galchina dabie chatro chatrirang, okumu chake jingjengatengon, NEHU-ni VC kamtangko watkujaskal, uamangni jingjengataniko dontongkujawa ine NEHU Students Union (NEHUSU) aro KSU NEHU Unit parakatahachim.
Jingjengatenggipa chatro chatrirangko grongengani ja·man kobor ra·timgipa manderang baksa agangrikengon, inquiry matchotkujaskal chatro chatrirangni okumu chake jingjengataniko dontongchina uamang mol·molna re·baaha ine a·dokni Chief Secretary DP Wahlang parakataha.
“Da·alo anga chatro chatrirang baksa agangrikna man·aha aro maini gimin uamangni jingjengataniko dontongna nangengachim, anga talate on·aha. Anga bebera·a uamang da·o jingjengatenggipa dolrang baksa apsan chanchirimenba, inquiry dakengmiting somoiode jingjengataniko dontonggen. Anga aro DGP da·alo a·dok sorkarini palsan ong·aigija an·tangtangni gitaba chatro chatrirangko grongna re·baaha,” ine Wahlang aganaha.
NEHU-ni acting Vice Chancellor Prof Nirmalendu Saha-ba kamtangko jako ra·angani ja·man, NEHU-o ong·enggipa obostarangni bidingo sandirokna gita dingtangmancha committee-ko songe on·angaha. Education Ministry-ni songe on·gipa member sakgnini committee, sal 15-ni gisepon report-ko on·na nangengachim.
Chatro chatrirangni okumu chake jingjengatani da·o sal 15 gappilengahani gimin okumu chake jingjengataniko dontongchina gitaba NEHU-ni acting VC, NEHUSU aro KSU NEHU Unit-ko mol·molangaha.